پاکستان مسلم لیگ (ن) کی ترجمان مریم اورنگزیب نے پیکا سمیت تمام کالے قوانین کے خلاف ہر فورم پر جنگ جاری رکھنے کا اعلان کیا ہے۔

مریم اورنگزیب نے اپنے جاری کردہ بیان میں کہا ہے کہ سیاہ حکومت سیاہ قوانین سے عدم اعتماد سے بچ نہیں سکتی، کالے قوانین بھی کالی حکومت کے ساتھ رخصت کریں گے۔

انہوں نے کہا کہ عمران صاحب کے جانے سے ہی پارلیمنٹ کے دروازے پر لگا تالا کھلے گا، عمران صاحب کے خوف ہے کہ پارلیمنٹ کی کرسیاں الٹا دیں، قالین اکھاڑ دیئے، ان شاءاللہ تمام کالے قوانین کو بھی اسی طرح اکھاڑ کر پھینکیں گے۔

ن لیگ کی ترجمان کا کہنا ہے کہ عمران صاحب جتنی مرضی کرسیاں الٹائیں، قالین اکھاڑیں، کالے قانون جاری کریں، آپ کی کرسی الٹنے سے نہیں بچ سکتی۔

مریم اورنگزیب نے مزید کہا کہ معزز عدالت نے ہمارے وکیل منصور صاحب کو عدالتی معاون مقرر کیا ہے، مقدمے کی سماعت کے دوران وہ ہمارے موقف کو بیان کردیں گے، حکومت اتنی خوفزدہ ہے کہ پارلیمنٹ کو مفلوج بنا کررکھ دیا ہے۔

وفاقی وزیر آئی ٹی امین الحق نے پیکا آرڈیننس سے متعلق یوٹرن لے لیا۔

وفاقی وزیرنے پہلے پیکا ایکٹ میں ترامیم کی سمری کابینہ کو بھجوائی اوراب آرڈیننس کی مخالفت کردی۔

سمری کے مطابق پیکا ایکٹ میں ترامیم کی سمری وزارت آئی ٹی نے کابینہ کو بھجوائی تھی۔

سمری کے مطابق وفاقی وزیر آئی ٹی کی منظوری سے سمری کابینہ کو بھیجی گئی تھی،پیکا ایکٹ میں ترامیم کی وزارت آئی ٹی کی سمری کابینہ نے منظور کی تھی۔

اب وزیر آئی ٹی نے پیکا ایکٹ ترمیمی آرڈیننس سے متعلق وزیراعظم کو خط لکھا ہے۔