شیخ رشید نے کہا ہے کہ تحریک عدم اعتماد کے نام پر خرید وفروخت جاری ہے۔

وفاقی وزیر داخلہ شیخ رشید نے پریس کانفرنس کرتے ہوئے کہا ہے کہ وزیراعظم کا دورہ روس انتہائی کامیاب رہا، بھارت کو وزیراعظم کا دوہ ایک آنکھ نہیں بھاتا۔

 انہوں نے کہا کہ تحریک عدم اعتماد کے نام پر خرید وفروخت جاری ہے ، نوازشریف نے خرید وفروخت کی ذمہ داری آصف زرداری کو دی، ، سیاست میں خرید وفروخت کا بازار شروع ہوا تو جھاڑو پھر جائے گا۔

شیخ رشید نے کہا کہ عمران خان 5 سال پورے کریں گے، ادارے جمہوری حکومت کےساتھ ہیں، اپوزیشن اپنی سیاسی قبر کھودنے جارہی ہے، عمران خان کو پتا ہے کس وقت کیا فیصلہ کرنا ہے۔

وفاقی وزیر داخلہ نے کہا کہ عمران خان ایسا سیاسی ڈرون ماریں گے کہ یہ نیست ونابود ہونگے، عمران خان سے دوستی ہے، جہانگیر ترین سے نہیں ملا، عدم اعتماد کی ناکامی کے بعد عمران خان مزید مضبوط ہونگے۔

انہوں نے کہا کہ اتحادی عمران خان کے ساتھ ہیں، بکاؤ کسی کو منہ دکھانے کے قابل نہیں ہونگے، عمران خان جرات کے ساتھ سارے کھیل کا مقابلہ کریں گے، پنجاب اور مرکز میں کس نے آنا ہے، ابھی اپوزیشن نے فیصلہ کرنا ہے۔

شیخ رشید نے کہا کہ پاکستان کے ادارے منتخب جمہوری حکومت کے ساتھ ہیں، سیاست میں خریدوفروخت کا بازار شروع ہوا تو جھاڑو پھرجائےگا، آپکی خریدوفروخت کےبازارمیں عمران خان سیاسی ڈرون حملہ کریں گے۔

وفاقی وزیر داخلہ نے کہا کہ ملک میں جمہوریت کاروبار بن جائے تو نتائج اچھے نہیں ہوتے، تمام مفاد پرست اکٹھےہوگئے ہیں،انہیں خوف اکٹھاکررہا ہے، نواز شریف نے172 لوگ پورے کرنے ہیں۔