وفاقی وزیر نیشنل فوڈ سیکیورٹی اینڈ ریسرچ سید فخر امام نے کہا ہے کہ زرعی برآمدات میں اضافے کیلئے اقدامات کئے جا رہے ہیں۔

سید فخر امام نے ضلع سرگودھا میں منعقدہ زرعی نمائش کا افتتاح کر دیا، اس موقع پر وزیر زراعت پنجاب حسین جہانیاں گردیزی، ممبر صوبائی اسمبلی شمیم آفتاب اور سیکرٹری زراعت پنجاب اسد رحمان گیلانین نے شرکت کی۔

جبکہ فرانسسیی سفیر، ڈپٹی کمشنر ضلع سرگودھا اصغر جوئیہ، وائس چانسلر سرگودھا یونیورسٹی پروفیسر سلیم مظہر، ایڈیشنل سیکرٹری زراعت پلاننگ شریں ناز سمیت محکمہ زراعت کے افسران اور کاشتکاروں کی کثیر تعداد بھی شریک اس موقع پر شریک ہوئی۔

وزیر زراعت پنجاب حسین جہانیاں گردیزی کا کہنا تھا کہ ضلع سرگودھا میں منعقدہ اس نمائش کا بنیادی مقصد ہائی ویلیو چین کو بہتر بنانا ہے، اس نمائش کے ذریعے کاشت کاروں اور برآمد کنند گان و دیگر اسٹیک ہولڈرز کے مابین روابط کو بہتر بنایا جائے گا۔

انہوں نے کہا کہ اس نمائش کے انعقاد سے قبل منعقدہ 5 نمائشوں کے ذریعے زرعی برآمدات میں 13.5 ملین ڈالر کا اضافہ ہوا۔

وفاقی وزیر نیشنل فوڈ سیکیورٹی اینڈ ریسرچ سید فخر امام کا کہنا تھا کہ سرگودھا میں منعقدہ اس پہلی نمائش کے ذریعے تمام اسٹیک ہولڈرز کو ایک ایسا پلیٹ فارم مہیا کیا گیا ہے جس سے زرعی برآمدات کو فروغ دیا جائے گا، وزیر اعظم پاکستان عمران خان کے ویژن کے مطابق زرعی برآمدات میں اضافے کیلئے اقدامات کئے جا رہے ہیں۔

سیکرٹری زراعت پنجاب اسد رحمان گیلانی نے کہا کہ محکمہ زراعت پنجاب ہائی ویلیو ایگریکلچر کے فروغ کیلئے 3 ارب 20 کروڑ کی لاگت سے اسٹبلشمنٹ آف ماڈل فارم منصوبہ پر عمل در آمد کر رہا ہے۔