لاہور: پی ایس ایل 7 کے فائنل میچ کی سیکیورٹی انتظامات کیلئے خصوصی ہدایات جاری کردی گئی ہیں۔

آئی جی پنجاب نے شائقین کرکٹ کی سیکیورٹی اور گاڑیوں کی پارکنگ کے لیے خصوصی انتظامات کرنے کے احکامات جاری کردیے ہیں۔

آئی جی پنجاب راؤ سردارعلی خان کا کہنا ہے کہ اسٹیڈیم آنے والے تمام شہریوں کی سیکیورٹی کیلئے جامع حکمت عملی کے تحت بہترین سیکیورٹی انتظامات کیے جائیں۔

آئی جی پنجاب نے ہدایت کی کہ خواتین شائقین کی سہولت اور سیکیورٹی کیلئے لیڈی وارڈنز کو تعینات رکھا جائے۔

ان کا کہنا تھا کہ کھلاڑیوں اور میچ آفیشلز کے ساتھ ساتھ شائقین کرکٹ کی فول پروف سیکیورٹی پنجاب پولیس کی اولین ترجیح ہے۔

راؤ سردار علی خان نے کہا کہ پولیس افسران فیلڈ میں موجود رہیں اور جوان ہائی الرٹ ہو کر اپنی ڈیوٹی سر انجام دیں۔

آئی جی پنجاب کا کہنا تھا کہ سینئر افسران خود ٹریفک مینجمنٹ کا جائزہ لیں اور ٹریفک کی ہموار روانی کو ہر صورت یقینی بنائیں۔

انہوں نے کہا کہ فائنل میچ دیکھنے کیلئے دوسرے شہروں سے آنے والے شائقین کرکٹ کی رہنمائی کے لیے وارڈنز اور اہلکاروں کو خصوصی ہدایات دی جائیں.

راؤ سردار علی خان کا کہنا تھا کہ ایمرجنسی سروسز کی گاڑیوں ایمبولنسز اور فائر بریگیڈ وغیرہ کی آمدو رفت میں کوئی تعطل نہ آنے پائے۔

انہوں نے ہدایات جاری کی کہ راستہ ایپ، راستہ ایف ایم 88.6 سوشل میڈیا اور میڈیا کے ذریعے شہریوں کو ٹریفک کی صورتحال کے بارے میں موثر آگاہی فراہم کی جائے۔

آئی جی پنجاب نے کہا کہ میچ کے اختتام اور شائقین کے اسٹیڈیم سے اخراج کے موقع پر بھی سیکیورٹی کے انتظامات کو مد نظر رکھا جائے

واضح رہے کہ پی ایس ایل 7 کا فائنل آج شام 7:30 بجے لاہور کے قذافی اسٹیڈٰیم میں کھیلا جائے گا جبکہ اس سے قبل پی ایس ایل 7 کی اختتامی تقریب آج شام 6 بجے منعقد کی جائے گی۔