وزیر داخلہ شیخ رشید نے کہا ہے کہ پاکستان اور ترکی بہترین دوست ممالک ہیں۔

ترکی کے نائب وزیرداخلہ اسماعیل گتاکلی کی وزیر داخلہ شیخ رشید احمد سے وفد کے ہمراہ ملاقات ہوئی جس میں پاک ترکی دوطرفہ تعلقات سمیت باہمی دلچسپی کے دیگر امور پر بات چیت کی گئی۔

ملاقات کے دوران پاک ترکی داخلہ وزارتوں کے درمیان تعاون اور اشتراک بڑھانے پراتفاق کیا گیا جبکہ علاقائی سکیورٹی صورت حال، غیر قانونی امیگریشن اور انسانی سمگلنگ پر بھی گفتگو کی گئی۔

اس موقع پر وزیر داخلہ شیخ رشید کا کہنا تھا کہ پاکستان اور ترکی بہترین دوست ممالک ہیں اور دونوں ممالک کے درمیان تعلقات انتہائی دیرینہ ہیں۔

شیخ رشید کا کہنا تھا کہ غیر قانونی امیگریشن اورانسانی سمگلنگ کی روک تھام دونوں ملکوں کا مشترکہ ہدف ہے، غیر قانونی امیگریشن اور انسانی سمگلنگ میں ملوث عناصر کے خلاف کارروائی کررہے ہیں۔

وزیر داخلہ شیخ رشید احمد کا مزید کہنا تھا کہ پاکستانی عوام مقبوضہ کشمیر پر ترک صدر طیب اردگان کے دو ٹوک موقف کے بہت معترف ہے، پاکستان اور ترکی کے درمیان سیاحت اور کاروبار کے فروغ کیلئے مزید آسانیاں پیدا کرینگے۔

ملاقات میں ترک نائب وزیر داخلہ نے شیخ رشیداحمد کے لئے ترک ہم منصب کی طرف سے نیک خواہشات کا پیغام پہنچایا۔

ترکی کے نائب وزیرداخلہ اسماعیل گتاکلی نے کہا کہ پاکستان اور ترکی کی داخلہ وزارتوں کے درمیان اشتراک بڑھانے کی ضرورت ہے، پاک ترکی داخلہ وزارتوں کے درمیان بہتر روابط سے غیرقانونی امیگریشن کوروکا جاسکتا۔

ملاقات میں ترک محکمہ امیگریشن کے چئیرمین ساوس انلواور ترک سفیر مصطفے احسان یرداکل شامل تھے جبکہ سیکرٹری داخلہ یوسف نسیم کھوکھر، ایڈیشنل سیکرٹری فخر عالم اور چیرمین نادرا طارق ملک نے بھی ملاقات شرکت کی۔

یاد رہے ترک نائب وزیر داخلہ اسماعیل گتاکلی چار رکنی وفد کے ہمراہ آج ایک روزہ دورے پر پاکستان پہنچے ہیں۔