سابق وزیر اعظم شاہد خاقان عباسی نے کہا ہے کہ نئی حکومت کو نیب کا خاتمہ کرنا ہوگا۔

پاکستان مسلم لیگ ن کے رہنما شاہد خاقان عباسی نے کراچی میں میڈیا سے گفتگو کرتے ہوئے کہا کہ چوہدری برادران کا احترام ہے، انکی سیاست سے اتفاق نہیں، انکو اقتدار کی نہیں بلکہ عوام کی سیاست کرنی چاہیے۔

انہوں نے کہا کہ چوہدری برادران سے سب کی ملاقاتیں اچھی رہتی ہیں، انہوں نے فیصلہ کرنا ہےعوام کے ساتھ ہیں یا حکومت کےساتھ، عدم اعتماد چوہدری برادران کے بغیر بھی کامیاب ہوجائے گی۔

شاہد خاقان نے کہا کہ ہمارے پاس تحریک عدم اعتماد کیلئے نمبرز پورے ہیں، ہمارا کام دعوت دینا تھا، فیصلہ چوہدری برادران کو کرنا ہے۔

مسلم لیگ ن کے رہنما کا کہنا ہے کہ نیب لوگوں کی زندگیوں سے کھیل رہا ہے، چیئرمین نیب کو جواب دینا ہوگا، نیب کے تماشے 22 سال سے بھگت رہے ہیں، نئی حکومت کو نیب کا خاتمہ کرنا ہوگا۔

سابق وزیر اعظم نے کہا کہ امید ہے چیئرمین نیب اپنی غلطی کا اعتراف کریں گے، نیب کیسز سیاسی وفاداریاں تبدیل کرنے کیلئے ہیں، اسد منیر نے نیب کیس کی وجہ سے خودکشی کی جبکہ احتساب عدالت نے گزشتہ روز اسدمنیر کے کیس کو خارج کردیا، چیئرمین نیب کو اسد منیر کے خاندان کو جواب دینا ہوگا۔

شاہد خاقان عباسی نے مزید کہا کہ عمران خان نے معیشت کو تباہ کردیا ہے۔