ایک نئی تبدیلی کی خبر سے معلوم ہوا ہے کہ ٹویٹر پوڈکاسٹ کو اہمیت دے رہا ہے۔ اس کا عملی اظہار ایک ٹیب کی صورت میں سامنے آئے گا جس کا ایک ماہر نے نوٹس بھی لیا ہے۔

سوشل میڈیا کے ماہرایلیسانڈ پالوزی نے سب سے پہلے اس کا اسکرین شاٹ شیئرکیا ہے۔ اس میں دیکھا جاسکتا ہےکہ ٹویٹر سائٰیڈ بار میں پوڈکاسٹ بٹن یا ٹیب کی آزمائش کررہا ہے۔ اس سے پہلے نیوی گیشن پینل کے نچلے حصے میں یہ بٹن نمودار ہوا تھا۔

تجزیہ کاروں کےمطابق ٹویٹر پوڈکاسٹ کی دنیا میں قدم رکھنا چاہتا ہے اور یوں اسے رفتہ رفتہ مائیکروبلاگنگ سے آگے بڑھانا چاہتا ہے۔ اس بٹن کی بدولت پوڈکاسٹر براہِ راست اپنے پوڈکاسٹ لانچ کرسکیں گے۔

گزشتہ برس ٹویٹر نے اسپیسس میں بھی پوڈکاسٹ شامل کرنے پر غور کیا تھا۔ اس کی وجہ یہ ہے کہ ٹویٹر اسپیسس پوری دنیا میں بہت مشہور ہورہی ہیں۔ ٹویٹر کے اندرونی حلقوں نے اسپیسس اور پوڈکاسٹ کے اپنے تجربات کو سوشل آڈیو کا نام دیا ہے۔ اپنی ندرت اور نئے پن کی وجہ سے یہ ایک غیرمعمولی تبدیلی ہوسکتی ہے جو ٹویٹر کو مزید بہتر بنائے گی۔ دوسری جانب آڈیو پیغام کا پلیٹ فارم کلب ہاؤس بھی تیزی سے اپنی اہمیت کھورہا ہے۔

لیکن آخرکار ٹویٹر اسے مونیٹائزیشن کے لیے استعمال کرسکتا ہے اور اس سے تخلیق کاروں کو بہت فائدہ ہوسکے گا۔ فلمسٹار سے لے کر گلوکار تک اپنے پلیٹ فارم پر لوگوں کو جمع کرسکیں گے اور اس سے رقم بناسکیں گے۔