میاں اسلم اقبال نے کہا ہے کہ مضبوط معیشت تیزرفتار صنعتی ترقی سے ہی ممکن ہے۔

صوبائی وزیر صنعت و تجارت میاں اسلم اقبال نے ٹینریز ایسوسی ایشن دین پور قصور کے عہدیداران کی تقریب حلف برداری سے خطاب کرتے ہوئے کہا کہ حکومت نے صوبے میں صنعتکاری کا عمل تیز کرنے کے لئے موثر لائحہ عمل اپنایا ہے، صوبے میں 10سپشل اکنامک زونزز بنائے گئے ہیں۔

انہوں نے کہا کہ مضبوط معیشت تیزرفتار صنعتی ترقی سے ہی ممکن ہے جبکہ روز گار کی فراہمی بھی صنعتکاری کے عمل سے جڑی ہے۔

صوبائی وزیر صنعت و تجارت کا کہنا تھا کہ اسپیشل اکنامک زونزز میں سرمایہ کاری کے لئے بہترین ماحول موجود ہے جبکہ صنعتی مراکز میں بھی عالمی معیار کا صنعتی انفراسٹرکچر دیا گیا ہے۔

میاں اسلم اقبال کا یہ بھی کہنا تھا کہ ملکی اور غیر ملکی سرمایہ کار سرمایہ کاری کے لئے پنجاب کے صنعتی مراکز کو ترجیح دے رہے ہیں۔

صوبائی وزیر صنعت و تجارت میاں اسلم اقبال کا مزیدکہنا تھا کہ چھوٹی اور درمیانے درجے کی صنعتوں کے فروغ کیلئے بھی موثر اقدامات کئے گئے ہیں، گزشتہ پونے چار سالوں میں ساڑھے تین سو ارب روپے سے زائد کی سرمایہ کاری آچکی ہیں۔

اس موقع پر صدر ایسوسی ایشن میاں شان الہی نےکہا کہ ٹینریز کے صنعتکاروں کے مسائل کے حل میں ذاتی دلچسپی لینے پر میاں اسلم اقبال کے مشکور ہیں۔

حلف برداری کی تقریب میں صنعت کاروں نے کثیر تعداد میں شرکت کی جبکہ حلف اٹھانے والوں میں صدر میاں شان الہی، سینئر نائب صدر میاں محمد مجاہد، نائب صدر نور احمد خان اور دیگر شامل تھے۔