سماجی فاصلے کے بغیر مسجد الحرام اور مسجد نبوی میں پہلی باجماعت نماز ادا کی گئی ہے جس میں پرنور مناظر دیکھنے کو ملے۔

غیر ملکی خبر ایجنسی کے مطابق سعودی عرب میں صحت کے امور کے نگراں کی جانب سے سماجی فاصلے کی پابندی کو ختم کردیا گیا ہے جس کے بعد  مسجد الحرام اور مسجد نبوی میں پہلی نماز سماجی فاصلے کے بغیر ادا کی گئی ہے۔

سعودی سرکاری خبررساں ایجنسی کے مطابق نماز کے دوران سماجی فاصلے رکھنے کی پابندی کو ختم کیا گیا ہے تاہم نمازیوں کے لیے ماسک پہننا ابھی بھی لازمی قرار دیا گیا ہے۔

ہہ بھی پڑھیں: عمرہ زائرین اور عازمین حج کے لئے بڑی خوش خبری

علاوہ ازیں سعودی عرب میں دیگر تمام کھلے اور بند مقامات پر بھی سماجی فاصلے کی شرط کو ختم کردیا گیا ہے۔

واضح رہے کہ سعودی عرب کی وزارت داخلہ نے ملک بھر میں متعدد کورونا پابندیوں کو ختم کرنے کا اعلان کیا ہے۔

وزارت داخلہ کے مطابق سعودی عرب آنے والے مسافروں کے لئے پی سی آر ٹیسٹ اور قرنطینہ کی شرائط کو ختم کر دیا گیا ہے۔

وزارت داخہ کے مطابق یہ فیصلہ ملک بھر میں کورونا کیسز میں کمی کے بعد کیا گیا ہے۔

دوسری جانب سعودی عرب کے حکام کی جانب سے مسجد الحرام میں نماز اور مسجد نبوی میں زیارت کے لیے اجازت نامے کی شرط کو بھی منسوخ کر دیا گیا ہے۔

سعودی وزارتِ حج و عمرہ کا کہنا ہے کہ عمرے کی ادائیگی اور مسجد نبوی میں روضہ مبارک میں نماز کی ادائیگی کے لیے توکلنا اور اعتمرنا کے ذریعے پیشگی اجازت نامے کی شرط کو برقرار رکھا گیا ہے۔

اس حوالے سے سعودی وزارتِ حج و عمرہ کا کہنا ہے کہ عمرہ اور روضہ میں پیشگی اجازت نامہ زائرین کو منظم کرنے اور بھیڑ سے بچنے کے لیے رکھا گیا ہے۔