دنیا کے آلودہ ترین شہروں کی فہرست میں کراچی  پندرہویں نمبر پر آگیا ہے۔

ایئر کوالٹی انڈیکس کے مطابق کراچی کی فضا میں آلودہ زرات کی مقدار 106 پرٹیکیولیٹ میٹرز ریکارڈ کی گئی جبکہ دنیا کے آلودہ شہروں میں دبئی صف اول اور دہلی دوسرے نمبر پر آگئے۔

درجہ بندی کے مطابق 151 سے200 درجے تک آلودگی مضر صحت ہے جبکہ 201 سے 300 درجے تک آلودگی انتہائی مضر صحت ہے۔

خیال رہے کہ 301 سے زائد درجہ خطرناک آلودگی کو ظاہر کرتا ہے جس کی وجہ سے ماہرین صحت نے سانس اور دمہ کے مریضوں کو احتیاط کی ہدایت دی ہے۔

فضائی آلودگی

فضائی آلودگی ہوا میں موجود وہ مادے یا ذرات ہوتے ہیں جو کہ انسانی سرگرمیوں کی بدولت فضا کا حصہ بنتے ہیں۔

فضائی آلودگی گیسوں کی زیادتی، زہریلی گیسوں، تابکاری شعاعوں، کیمیائی مادوں، ٹھوس ذرات، مائع قطرات، گرد و غبار اور دھویں وغیرہ کی وجہ سے پیدا ہوتی ہے اور یہ انسانی صحت اور ماحول دونوں کو نقصان پہنچانے کا باعث بنتے ہیں۔

کراچی کا موسم

شہر قائد میں آج موسم گرم اور مرطوب رہنے کا امکان ہے۔

محکمہ موسمیات کے مطابق کراچی میں آج کم سے کم درجہ حرارت 20 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35ڈگری سینٹی گریڈ ریکارڈ کیا گیا۔

ہوا میں نمی کا تناسب 83 فیصد ریکارڈ کیا گیا جبکہ اس وقت شہر میں 18کلو میٹر فی گھنٹہ کی رفتار سے شمال مغربی ہوا چل رہی ہے۔

محکمہ موسمیات نے بتایا کہ شہر میں بارش کا کوئی امکان نہیں ہے، اب مسلسل درجہ حرارت میں اضافے کی توقع ہے۔