پاکستانی نژاد آسٹریلوی کھلاڑی عثمان خواجہ پاکستانی شائقین سے ناراض ہو گئے ہیں۔

پاکستان میں پیدا ہونے والے آسٹریلین ٹیسٹ ٹیم کے اوپننگ بلے باز عثمان خواجہ نے پہلی بار پاکستان کی سرزمین پر ٹیسٹ میچ کھیلا، جسے انہوں نے خوشگوار تجربہ قرار دیا۔

اس دوران تماشائیوں کی جانب سے بھی عثمان خواجہ کو بھرپور سپورٹ کیا گیا اور ان کی بیٹنگ کے دوران پاکستانی شائقین ان کا پوسٹر بھی ساتھ لائے جس پر لکھا تھا ’’عثمان خواجہ اپنا ہی گھر سمجھو‘‘۔

یہ بھی پڑھیں: ’عثمان خواجہ اپنا ہی گھر سمجھو‘ پنڈی اسٹیڈیم میں پاکستانی مداح کا خصوصی پیغام 

عثمان خواجہ نے پہلی اننگز میں پاکستان کے خلاف بہترین بلے بازی کا مظاہرہ کیا تاہم وہ صرف 3 رنز کی کمی سے اپنی سنچری مکمل نہ کرسکے اور نعمان علی نے جب ان کی وکٹ حاصل کی تو پاکستانی شائقین کی جانب سے جشن منایا گیا جو آسٹریلین بلے باز کو بالکل بھی پسند نہ آیا۔

ایک ویڈیو میں عثمان خواجہ نے اردو میں پیغام دیتے ہوئے کہا کہ اسلام آباد اور پنڈی کا شکریہ، یہاں کھیلنے میں بہت مزا آرہا ہے، شائقین بہت اچھے ہیں، پوری آسٹریلین ٹیم کو یہاں کھیلنا اچھا لگا۔

Rawalpindi! @UsmanKhawaja isn't too happy with you, he’s telling you why!
Any more queries on how to pronounce Marnus Labuschagne? We can help. #BoysReadyHain l #PAKvAUS pic.twitter.com/4CcPm3Wx6Z

— Pakistan Cricket (@TheRealPCB) March 7, 2022

ویڈیو میں عثمان خواجہ نے ایک شکایت بھی کی، ان کا کہنا تھا کہ جب وہ آوٹ ہوئے، تو شائقین نے بہت شور کیا اور وہ خوش ہوئے، جو مجھے اچھا نہیں لگا۔

 یہ بھی پڑھیں: عثمان خواجہ پنڈی کرکٹ اسٹیڈیم میں کھیلنے کے لیے پُرجوش

انہوں نے لوگوں سے یہ بھی کہا کہ اگلی بار اتنا خوش نہیں ہونا پلیز ، ویڈیو میں دونوں ٹیموں کے کھلاڑیوں کو آپس میں وقت گزارتے، مزاق کرتے اور ایک ساتھ پریکٹس کرتے بھی دیکھا جا سکتا ہے۔