وزیر اعظم آزاد جموں و کشمیر سردار عبد القیوم نیازی نے کہا ہے کہ پاکستان کو عالمی چیلنجز درپیش ہیں۔

تفصیلات کے مطابق سردار عبد القیوم نیازی نے اپنے جاری کردہ ایک بیان میں کہا کہ پاکستان کو عالمی چیلنجز درپیش ہیں، پاکستان کو دھمکیاں مل رہی ہیں، اپوزیشن جماعتیں پاکستان کو عدم استحکام کا شکار کرنے کی سازش کر رہی ہے۔

انہوں نے کہا کہ وزیر اعظم عمران خان کو کوئی خطرہ نہیں ، وہ اپنی مدت پوری کریں گے، اپوزیشن کی ہر کوشش ناکام ہو گی ، عمران خان 2023 میں پھر اقتدار میں آئیں گے، عمران خان پاکستان کو ریاست مدینہ بنانے کے راستے پر گامزن ہے۔

ان کا کہنا تھا کہ میرا کوئی ایجنڈا نہیں ،عمران خان کا ایجنڈا میرا ایجنڈا ہے، غریب کو اپنے قدموں پراٹھانا ،ملکی مفادات پر سودے بازی نہ کرنا،کرپٹ مافیا کا احتساب اور تحریک آزادی کو اجاگر کرنا ترجیحات ہیں۔

سردار عبد القیوم نیازی نے کہا کہ وزیر اعظم عمران خان کے اعتماد پر پورا اتروں گا، اپوزیشن اپنی کرپشن چھپانے اور کڑے احتساب سے بچنے کے لئے لئے سیاسی ڈرامہ بازیاں کر رہی ہے مگر یہ احتساب سے بچ نہیں سکیں گے۔

وزیر اعظم آزاد جموں و کشمیر سردار عبد القیوم نیازی کا مزید کہنا تھا کہ عمران خان کی صورت میں قائد اعظم اور بھٹو کے بعد پاکستان کو تیسرا بڑا لیڈر ملا ہے جو ملک کو اندرونی اور بیرونی سازشوں سے بچا رہا ہے، عمران خان سسٹم کو ٹھیک کر رہا ہے وہ ریاست مدینہ قائم کر کے رہے گا۔