جنوبی کوریا میں حزب اختلاف کے لیڈر اور صدارتی امیدوار یون سک یول نے حکمران جماعت کے امیدوار کو شکست دے کر صدر منتخب ہو گئے۔

غیر ملکی میڈیا کے مطابق کنزرویٹو پارٹی کے لیڈر یون سک یول نے حکمراں جماعت ڈیموکریٹک کو شکست دے کر صدارتی منصب حاصل کر لیا۔

جنوبی کوریا میں ہونے والے صدارتی انتخابات کے دوران کنزرویٹو پارٹی کے امیدوار یون نے 48.56 فیصد ووٹ حاصل کئے جبکہ ڈیموکریٹک کے حریف امیدوار لی جے میونگ نے 47.83 فیصد ووٹ حاصل کئے، تیسرے نمبر پر پروگریسو جسٹس پارٹی کے سم سانگ جونگ تھے جو صرف 2.37 فیصد ووٹ حاصل کر سکے۔

صدارتی انتخابات میں فتح کے بعد کنزر ویٹو پارٹی کے لیڈر نے قومی اسمبلی کی عمارت میں جشن منایا اور کہا کہ یہ بہترین عوام کی جیت ہے۔

نو منتخب صدر یون سک کا اپنے حریفوں لی اور سم کا شکریہ ادا کرتے ہوئے کہنا تھا کہ اب ہمیں ملک کے لیے ساتھ مل کر کام کرنے کی ضرورت ہے۔

واضح رہے کہ یون سک یول جنوبی کوریا میں قدامت پسند اور شمالی کوریا کے خلاف سخت گیر پالیسیوں کے حامی مانے جاتے ہیں، انہوں نے الیکشن کے دوران ملک میں کورونا بحران، ملازمت اور سیاسی امور کو مہم کا حصہ بنایا۔

نومنتخب صدر نے خارجہ امور کے حوالے سے اہم اقدامات اٹھانے کا بھی عندیہ دیا ہے۔