شاہ محمود قریشی نے کہا ہے کہ ہندوستان کا رویہ انتہائی غیر ذمہ دارانہ ہے، اسے کٹہرے میں لانے کی ضرورت ہے۔

پاکستان کی فضائی حدود کی خلاف ورزی کے حوالے سے وزیر خارجہ مخدوم شاہ محمود قریشی نے کہا ہے کہ یہ دوسری مرتبہ ہماری فضائی حدود کی خلاف ورزی ہوئی ہے اور ہندوستان کو اس حرکت کیلئے جوابدہ ہونا پڑے گا۔

انہوں نے کہا کہ ہم نے ہندوستان کی جانب سے پاکستان میں دہشت گردی کی پشت پناہی کے ٹھوس ثبوت ایک ڈوزیر کے ذریعے عالمی برادری کے سامنے رکھے اور بھارت کا اصلی چہرہ دنیا کے سامنے بے نقاب کیا۔

 ان کا کہنا تھا کہ ہندوستان کی حرکت تشویشناک ہے جس سے سعودی ایئرلائن کا جہاز، قطر اور پاکستان کی ڈومیسٹک پروازیں نشانہ بن سکتی تھیں اور معصوم لوگ نشانہ بن سکتے تھے، بین الاقوامی برادری کو اس حرکت کا نوٹس لینا چاہئے۔

وزیر خارجہ نے کہا کہ دفاع ہم نے کل بھی کیا تھا اور آئندہ بھی کریں گے، ہم جارحیت کے قائل نہیں ہیں  سمندری و فضائی حدود کی خلاف ورزیاں سب کے سامنے ہیں۔

انہوں نے مزید کہا کہ ہم نے فیصلہ کیا ہے کہ  پی 5 ممالک کے نمائندگان کو وزارت خارجہ میں مدعو کر کے، انہیں ساری صورتحال سے آگاہ کریں گے اور ہمیں توقع ہے کہ عالمی برادری اس کا نوٹس لے گی۔

شاہ محمود قریشی کا کہنا تھا کہ وزارت خارجہ نے بھارتی ناظم الامور کو دفتر خارجہ بلا کر وضاحت طلب کی ہے اور ہندوستان کی وضاحت کے بعد اگلے لائحہ عمل کا فیصلہ کریں گے۔

انہوں نے کہا کہ ہندوستان میں آج ہندتوا اور اکھنڈ بھارت کی سوچ کی حامل حکومت برسراقتدارہے اور صورتحال اتنی بگڑ چکی ہے کہ یورپی یونین پارلیمنٹ کے 21 ممبران نے اسپیکر لوک سبھا کو خط لکھا ہے جس میں انہوں نے بھارت سرکار سے ہندوستان میں اقلیتوں اور انسانی حقوق کا دفاع کرنے والوں کے ساتھ ناروا سلوک کی وضاحت طلب کی ہے۔

ان کا کہنا تھ کہ ہم جارحیت کے حامی نہیں، ہم ہندوستان سمیت اپنے ہمسایوں کے ساتھ اچھے تعلقات کی خواہاں ہیں۔