وزیراعلیٰ پنجاب سردار عثمان بزدار سے اراکین اسمبلی کی ملاقاتوں کا سلسلہ جاری ہے۔

وزیراعلیٰ عثمان بزدار سے غزین عباسی، سمیع اللہ چوہدری، طاہر بشیر چیمہ اور ندیم قریشی نے ملاقات کی جس میں سیاسی صورتحال اور جنوبی پنجاب میں جاری ترقیاتی منصوبوں پر تبادلہ خیال ہوا۔

ملاقات میں بہاولپور میں جنوبی پنجاب سیکرٹریٹ کے قیام کے منصوبے کے حوالے سے بھی بات چیت ہوئی۔

عثمان بزدار نے ملاقات میں گفتگو کرتے ہوئے کہا کہ  جنوبی پنجاب کے لئے 35فیصد ترقیاتی فنڈز مختص کرنے کا اعزاز ہماری حکومت کو حاصل ہوا ہے۔

انہوں نے کہا کہ جنوبی پنجاب کے لئے ملازمتوں میں 32فیصد کوٹہ مختص کرنا تاریخ ساز اقدام ہے، جنوبی پنجاب سیکرٹریٹ کو مالی وانتظامی خود مختاری دی ہے۔

وزیراعلیٰ پنجاب کا کہنا ہے کہ یہ وہ اقدامات ہیں جس کے ذریعے جنوبی پنجاب کو 70برس بعد اس کا حق واپس کیا ہے، اپوزیشن اب سیاسی انتشار پھیلا کرعوام کی خوشحالی کے اقدامات کو ڈی ٹریک کرنا چاہتی ہے۔

عثمان بزدار نے مزید کہا کہ عوام کی حمایت سے اپوزیشن کی ہر سازش کو پہلے بھی ناکام بنایا او آئندہ بھی بنائیں گے، تحریک عدم اعتماد کی یقینی ناکامی دیکھ کر اپوزیشن رہنماؤں کے چہروں پر مایوسی عیاں ہے۔