بھارت کی معروف اداکارہ عالیہ بھٹ نے بالی ووڈ کنگ شاہ رُخ خان کے بارے میں ایک انٹرویو میں انکشاف کیا کہ وہ کھانا نہیں کھاتے۔

بھارتی میڈیا رپورٹ کے مطابق اپنے ایک پُرانے انٹرویو میں بھارتی خوبرو اداکارہ عالیہ بھٹ نے انکشاف کیا کہ انہوں نے کنگ خان یعنی شاہ رُخ خان کو کبھی کھانا کھاتے ہوئے نہیں دیکھا۔

بھارتی میڈیا ہندوستان ٹائمز کی رپورٹ کے مطابق عالیہ بھٹ نے 2016 میں دیے گئے  انٹرویو میں بتایا تھا کہ انہوں نے اپنی فلم ‘ڈیئر زندگی’ کے سیٹ پر شاہ رخ کو کبھی کھانا کھاتے نہیں دیکھا۔

اداکارہ نے کہا کہ شاہ رخ میں ایسا کچھ نہیں ہے جو مجھے ناپسند ہو البتہ ان کی ایک عادت مجھے پسند نہیں اور میں کافی پریشان بھی ہوئی، وہ یہ کہ وہ کھانا نہیں کھاتے۔

عالیہ نے بتایا کہ ڈئیر زندگی کی شوٹنگ کے دوران ایک موقع ایسا آیا جب سیٹ پر مکمل خاموشی تھی اور کسی کو بھی بولنے کی اجازت نہیں تھی کہ اچانک مجھے شاہ رخ کے پیٹ سے کچھ آوازیں سنائی دیں۔

اداکارہ نے کہا کہ یقینی طور پر شاہ رخ کے پیٹ سے اسی لیے آوازیں آرہی تھیں کیونکہ انہوں نے کچھ نہیں کھایا تھا جس کے بعد ہم نے انہیں بسکٹس دیئے۔

عالیہ بھٹ نے بتایا کہ شاہ رخ بہت زیادہ کافی پیتے ہیں، کافی میں بھی پیتی ہوں لیکن میں کھانا بھی کھاتی ہوں مگر اداکار صرف کافی یا اس کے ساتھ بسکٹس یا کچھ اور ہلکا پھلکا کھالیتے ہیں مگر کھانا کھاتے ہوئے کبھی نظر نہیں آئے۔

آخر شاہ رُخ خان کھانا کیوں نہیں کھاتے؟

رپورٹ کے مطابق شاہ رخ خان نے اپنی فلم ‘زیرو’ کی ریلیز سے قبل 2019 میں دیے گئے انٹرویو میں کھانا نہ کھانے کی وجہ بتائی تھی۔

اس انٹرویو میں اداکار نے بتایا کہ والدہ کی وفات کے بعد کچھ بھی پہلے جیسا نہیں رہا، یہ تھوڑا سا نفسیاتی معاملہ ہے، 20 سال سے زائد کی عمر تک ماں خود مجھے اپنے ہاتھوں سے کھانا کھلاتی تھیں، ان کے انتقال کے بعد میری کھانے میں دلچسپی ہی نہیں رہی۔

شاہ رخ خان کا کہنا تھا کہ مجھے میرے والدین کے ہاتھ کے کھانے کی عادت تھی، میں یہ نہیں کہہ رہا کہ دوسرے لوگ اچھا نہیں پکاتے لیکن میری والدہ اور والد دونوں کو ہی کھانا پکانے کا بہت شوق تھا اور وہ ذائقہ ان کے ہاتھوں سے چھلکتا تھا اور جب سے وہ دونوں بچھڑے تو ان کا کھانے پینے سے دل ہی اُٹھ گیا۔

شاہ رخ خان نے کہا کہ اگر کوئی شخص انہیں کھانے کے لیے کسی بھی چیز کی پیشکش کرے تو وہ بخوشی قبول کرتے ہیں لیکن ان کا خود سے کچھ بھی کھانے کا دل نہیں کرتا۔

واضح رہے شاہ رخ کی والدہ لطیف فاطمہ خان کا انتقال 1990 میں ہوا تھا۔