پرویز خٹک نے کہا ہے کہ یقین دلاتا ہوں کہ اتحادی ہمارے ساتھ ہیں اور رہینگے۔

وفاقی وزیر دفاع پرویز خٹک سے صحافی نے سوال کیا کہ اتحادی  جماعتوں سے رابطے ہیں کیونکہ انکا جھکاؤ اپوزیشن کی جانب ہے؟ اس کے جواب میں پرویز خٹک نے کہا کہ کیا پتہ ہم (اتحادی)ایک پیج پر ہوں، یقین دلاتا ہوں کہ اتحادی ہمارے ساتھ ہیں اور رہینگے۔

انہوں نے کہا کہ تحریک عدم اعتماد کے معاملے میں کسی کے ساتھ کوئی زیادتی نہیں ہوگی، وزیراعظم نے تمام کارڈ اپنے پاس رکھے ہیں جووقت کے ساتھ سامنے آئیں گے، امید ہے کہ اپوزیشن کو تحریک عدم اعتماد کے معاملے پر شرمندگی ہوگی۔

پرویز خٹک نے کہا کہ ہم تمام ممبران سے مل چکے ہیں، وہ ہمارے ساتھ ہیں، اپوزیشن نے جو ماحول بنایا ہے، وہ جلد بدل جائے گا، حکومت کو تحریک اعتماد کے ذریعے ہٹانا مشکل کام ہے، یہ کیسے ہوسکتا ہے کہ جو ہمارے ٹکٹ پر لڑے وہ ہمارے خلاف ہوجائے۔

وفاقی وزیر دفاع نے کہا کہ ہمیں یقین ہے پارٹی میں سے کوئی دھوکہ نہیں دے گا، اتحادیوں کے ساتھ مکمل رابطے میں ہیں، جو ماحول بنا ہے اس کا جلد ڈراپ سین ہونے والا ہے۔

انہوں نے کہا کہ گارنٹی سے کہتا ہوں جو شور مچا ہے اس کا نتیجہ انکے حق میں نہیں جائے گا، سب کو اپنی طاقت کے ذریعے لڑنا چاہیے، نہ کہ ٹکٹ کا لالچ دیکر، جو ممبر دوسری طرف جانا چاہتا ہے وہ استعفیٰ دے اور مقابلے میں آئے۔

پرویز خٹک نے کہا کہ پی ٹی آئی کے تمام دھڑے متحد ہو جائیں گے، قومی اسمبلی اجلاس سے متعلق اسپیکر ایک دو دن میں آگاہ کرینگے، جلسے کا مقصد ہے کہ لوگ آئیں، ان تین چوہوں کو دیکھیں، جو ان کو ہٹانا چاہتے ہیں۔

 وفاقی وزیر دفاع نے کہا کہ پی ٹی آئی کے جلسوں میں 2018 سے زیادہ کا جذبہ دیکھ رہا ہوں، عمران خان واحد شخص ہے جو بین الاقوامی سطح پر جواب دے سکتے ہیں۔