حکومت کی جانب سے تحریک عدم اعتماد کو ناکام بنانے کے لئے نئی اور بہتر حکمت عملی تیار کرلی گئی ہے۔

وزیراعظم عمران خان کی زیر صدارت سیاسی کمیٹی کا اجلاس منعقد ہوا جس میں قانونی ماہرین نے وزیراعظم کو قانونی نکات پر بریفنگ دی۔

 تحریک عدم اعتماد کے حوالے سے وزیراعظم عمران خان کو آئینی و قانونی ٹیم کی جانب سے بریفنگ پیش کی گئی ہے جس میں انہیں بتایا گیا ہے کہ عدم اعتماد کا واحد حل مستقل تاخیر ہے۔

ذرائع کے مطابق بریفنگ کے دوران فروغ نسیم نے شرکا کو بتایا کہ اجلاس شروع ہونے کے کچھ دیر بعد اسپیکر اجلاس غیر معینہ مدت تک ملتوی کرنے کا اختیار رکھتے ہیں۔

تجویز کے مطابق اجلاس غیر معینہ مدت کے لئے ملتوی ہونے کے بعد اپوزیشن کو دوبارہ اجلاس بلانے کے لئے ریکوزیشن دینا ہوگی۔

فروغ نسیم اور بابر اعوان کی تجاویز کے مطابق عدم اعتماد کی تحریک پر ایجنڈا لایا جائیگا جس میں اکثر ایسا ہوتا ہے کہ ایجنڈا مکمل کئے بغیر اجلاس ملتوی کردیا جاتا ہے۔

اس سے متعلق بابر اعوان نے واضح کیا کہ اسپیکر کا استحقاق ہے کہ وہ غیر مکمل ایجنڈا پر بھی اجلاس ملتوی کرسکتا ہے اور جب تک ارکان کی مطلوبہ تعداد حاصل نہ ہو جائے تاخیر کی جاسکتی ہے۔

ان کی پیش کی جانے والی حکمت عملی کے مطابق طول دینے سے منحرف ارکان کہیں کے نہیں رہیں گے اور تاخیر کے دوران منحرف ارکان سے بات کی جائے۔

حکمت عملی میں واضح کیا گیا ہے کہ اس تمام معاملے میں اسپیکر قومی اسمبلی کا اختیار حتمی ہے جس میں عدالت بھی مداخلت نہیں کرسکتی ہے۔

اجلاس میں عدم اعتماد کو ناکام بنانے کے لئے پیش کی جانے والی حکمت عملی کے حوالے سے وزیراعظم کا کہنا تھا  کہ اپوزیشن مائنس عمران خان چاہتے ہیں ان کی کوششوں کو ناکام کریں گے اور 27 مارچ کو قوم تبدیلی دیکھے گی۔