بھارتی ٹینس اسٹار اور پاکستان کے آل راؤنڈر کرکٹر شعیب ملک کی اہلیہ ثانیہ مرزا نے حال ہی میں ایک انٹرویو میں انکشاف کیا ہے کہ ساجد خان نے انہیں ایک آئٹم سانگ آفر کیا تھا۔

رپورٹ کے مطابق شعیب ملک اور ثانیہ مرزا حال ہی میں ایک ٹی وی شو میں شریک ہوئے جہاں شو کے میزبان اور اداکار آغا علی نے ثانیہ سے بھارتی ہدایتکار ساجد خان کے بارے میں سوال پوچھا۔

جس پر ثانیہ مرزا نے انکشاف کیا کہ ماضی میں ان کے قریبی ساتھی اور ہدایتکار ساجد خان نے آئٹم سانگ کرنے کی آفر کی تھی۔

انہوں نے اس واقعے پر تفصیل سے بات کرتے ہوئے بتایا کہ ساجد میرے پاس آیا اور کہا کہ تم میری فلم میں آئٹم سانگ کرلو میں تمہیں اس گانے میں پہننے کے لیے پورے کپڑے دوں گا۔

انہوں نے کہا کہ ساجد کی پوری کوشش تھی کہ میں وہ گانا کرلوں، اس نے کہا کہ تمہیں مجھ پر بھروسہ نہیں ہے، میں تمہیں ایسے کپڑے دوں گا جس میں جسم نمایاں نہیں ہوگا، یہ بس ایک گانا ہے، اسے کرلو۔

انہوں نے کہا کہ میں نے اسے انکار کردیا، مجھے لگتا ہے کہ یہ میرا کام نہیں ہے لیکن پھر بھی آپ کسی بھی چیز کو ہمیشہ کے لیے نہ نہیں کہہ سکتے اور نہ ہی آپ کو یہ کہنا چاہیے کہ میں ایسا کبھی نہیں کروں گا۔

شو کے دوران شعیب ملک نے ثانیہ مرزا کی اُردو کے حوالے سے بات کرتے ہوئے کہا کہ ثانیہ کی اردو کافی اچھی ہے کیونکہ انہوں نے اسکول میں اردو پڑھی ہے۔

شعیب ملک نے بتایا کہ بھارتی حیدرآباد جہاں سے ثانیہ تعلق رکھتی ہیں، وہاں کوئی بھی بات یا واقعہ اگر 20 سال پہلے ہوا ہے، تو کہا جاتا ہے کہ ‘پرسوں’ ہوا ہے جس کے بعد میں کبھی کبھی حیران رہ جاتا ہوں۔