خیبر پختونخوامیں پولیو کےنئے کیسزسامنے آگئے۔

تفصیلات کے مطابق خیبرپختونخوا سے پولیو کے 4 نئے کیسز رپورٹ ہوئے ہیں۔

ای او سی خیبرپختونخواکے مطابق پولیو کے تین کیسز لکی مروت جبکہ ایک ٹانک سے رپورٹ ہوئے، نئے کیسز کے ساتھ صوبے میں پولیو کیسز کی تعداد 72 ہوگئی۔

پولیو حکام کاکہناہے کہ  ضلع ٹانک میں گیارہ ماہ کی بچی میں پولیو وائرس کی تصدیق ہوئی ہے جبکہ ضلع لکی مروت سےگیارہ ماہ کے دو بچوں اور تین ماہ کے ایک بچے میں پولیو وائرس کی تصدیق ہوئی ہے۔

واضح رہے کہ دو ہفتہ قبل بھی صوبہ خیبرپختونخوا میں پولیو کے 4 کیسز سامنے آئے ہیں جس نے محکمہ صحت کی پریشانی میں اضافہ کردیا ہے۔

صوبہ خیبرپختونخوا میں ایک ہی وقت میں4  نئے پولیو کیسز سامنے آئے۔ نئے پولیو کیسز لکی مروت، بنوں، اپر اور لوئر کوہستان سے رپورٹ ہوئے ۔ ضلع لکی مروت میں علاقہ بیست خیل تحصیل سرائے نورنگ کی 3 ماہ کی بچی کے نمونے 7 نومبر کو قومی ادارہ صحت اسلام آباد کو بجھوائے گئے تھے جس میں پولیو وائرس کی تصدیق ہوئی ہے۔ بچی نے پولیو سے بچاؤ کے کوئی قطرے نہیں پیئے تھے۔

اسی طرح بنوں کے علاقے جانی خیل تحصیل وزیر کے 10 ماہ کے بچے کے نمونے بھی 31 اکتوبر کو لیبارٹری بھیجے گئے تھے۔  بچے نے مختصر مدت میں اضافی ڈوزز میں صرف 5 ڈوزز حاصل کی تھیں جبکہ روٹین ایمونائزیشن میں صرف ایک ڈوز لی تھی ۔ بچے میں  پولیو وائرس کی تصدیق ہوئی ۔