پروٹین یونانی زبان کے لفظ پروٹوز سے ماخوذ ہے جس کے معنی بنیاد کے ہیں، یہ غذا کا ایک اہم جز ہے، جو جسم میں مختلف نظام کی انجام دہی میں کلیدی کردار ادا کرتا ہے۔

 جسم کو 20 طرح کے امائنوایسڈ کی ضرورت ہوتی ہے اور یہ ایک چین کی صورت میں مل کر پروٹین بناتے ہیں۔

پروٹین جسم کی بڑھوتری، ٹشوز کی مرمت اور کیمیائی پیغامات کی خلیہ، ٹشو اوردیگر اعضاء تک رسائی کو یقینی بناتے ہیں اور ساتھ ہی جسم کی پی ایچ کی سطح کو توازن میں رکھتے ہیں۔

گوشت کو پروٹین کے حصول کا سب سے مؤثرذریعہ سمجھا جاتا ہے لیکن آجل کل گائے اور مرغی کے گوشت میں بیماری پھیلنے اور بکرے کے گوشت انتہائی مہنگا ہونے کے سبب اکثریت اس اہم جز کی کمی کا شکار ہورہی ہے جو جسم میں کئی بیماریوں کا سبب بن رہی ہے۔

روزانہ دن بھرمیں پروٹین کی 46 سے 56 گرام مقدار شامل رکھنا از حد ضروری ہے تاکہ جسم کے تمام افعال بہتر اور صحت مند انداز میں کام انجام دیتے رہیں اور یہ آپ گوشت کے متابادل ذرائع سے بھی حاصل کر سکتے ہیں جن کی فہرست دی جارہی ہے۔

انڈے اور ڈیری پروڈکٹس پروٹین حاصل کرنے میں اہم کردار ادا کرتی ہیں کیو نکہ ان میں تمام امائنوایسڈ پائے جاتے ہیں جبکہ پودوں سے حاصل ہونے والے پروٹین ضروری امائنوایسڈ سے محروم ہوتے ہیں اگر چہ ان میں بھی پروٹین کثیر تعداد میں پایا جاتا ہے۔

پھلیاں

تمام پھلیاں جن میں سویابین، لال لوبیا جسے کڈنی بین بھی کہا جاتا ہے پروٹین سے بھر پور ہوتی ہیں، اسے پروٹین حاصل کرنے کے لئے گوشت کا بہترین متبادل بھی سمجھا جاتا ہے یہ آپ کو دن بھر کے لئے 14 سے 29 گرام تک پروٹین فراہم کرتی ہیں۔

گریاں

بادام، مونگ پھلی، کاجو اور پستے پروٹین سے بھر پور ہوتے ہیں یہ امائنو ایسڈ کے ساتھ فائبر، اینٹی آکسیڈینٹس جیسے وٹامن اے، ای کے ساتھ دل کے لئے مفید فیٹی ایسڈ حاصل کرنے کا بھی بہترین ذریعہ ہے، اس سے آپ 4 سے 9 گرام تک پروٹین حاصل کر سکتے ہیں۔

بیج

سورج مکھی، کدو، السی کے بیج اورتل پروٹین کا بہترین ماخذ ہیں ان کے استعمال سے 6 سے 15 گرام تک پروٹین حاصل کیا جاسکتا ہے۔

ڈیری 

دودھ اور دودھ سے بنی اشیاء میں پروٹین کثرت سے پایا جاتا ہے جیسے چیڈراور کاٹیج چیز، انڈے، آئس کریم وغیرہ، یہ غذائیں پروٹین کے ساتھ کیلیشیم حاصل کرنے کا بھی مؤثر ذریعہ ہے۔ حیرت انگیز طورپر آپ کو ان اشیاء سے 3 سے 30 گرام تک پروٹین حاصل ہوتا ہے۔

اناج

نشاستہ سے بھرپور اناج میں پروٹین کی کثیر تعداد پائی جاتی ہے جو پٹھوں کی تعمیر میں اہم کردار ادا کرتا ہے۔ یہ دن بھر کے لئے 4  سے  9 گرام تک پروٹین فراہم کرتے ہیں۔