وزارت خارجہ میں 14 ممالک کے 19 زیر تربیت سفارت کاروں نے ستائیسویں جونیئر ڈپلومیٹک کورس میں فارن سروس اکیڈمی پاکستان سے تربیت مکمل کر لی ،  اختتامی تقریب میں عندلیب عباس کہتی ہیں ہماری خارجہ پالیسی میں افریقہ کو خصوصی اہمیت حاصل ہورہی ہے۔

وزارت خارجہ میں مختلف ممالک کے سفارتکاروں کے ستائیسویں جونئیرڈپلومیٹک کورس کی گریجویشن تقریب کا  انعقاد کیا گیا جس کی صدارت پارلیمانی سیکریٹری خارجہ امور عندلیب عباس نے کی-

تقریب میں سیکرٹری خارجہ سہیل محمود سابق سیکرٹری خارجہ اعزاز چوہدری اور تہمینہ جنجوعہ،ڈی جی فارن سروس اکیڈمی آفتاب کھوکھر سمیت غیر ملکی سفراء اور اعلیٰ حکام نے شرکت کی-

عندلیب عباس نے ستائیسویں جونیئر ڈپلومیٹک کورس کی تکمیل پر شرکاء کو مبارکباد دی اور کہا کہ ہماری خارجہ پالیسی میں افریقہ کو خصوصی اہمیت حاصل ہورہی ہے, افریقہ کے ساتھ قریبی تعلقات کی معاشی، سٹرٹیجک اور سیاسی اہمیت کا گہرا ادراک ہے, چند روز قبل ہی افریقہ میں تعینات پاکستانی سفراءکی اہم کانفرنس اسی مقصد کے حصول کے لئے تھی-

عندلیب عباس کا کہنا تھا کہ آنے والے ماہ وسال میں افریقہ کے خطے کے ساتھ تعلقات کو مزید وسعت دینے جارہے ہیں

انہوں نے کہا کہ سارک تنظیم کے قیام کے 35سال کے عرصے میں سارک ممالک کے درمیان تعاون میں ٹھوس پیش رفت دیکھنے میں آئی لیکن اسے فروغ دینے کی ضرورت ہے,سفراء کسی بھی ملک کا قیمتی اثاثہ ہوتے ہیں اکثر پاکستان سے تربیت پانے والے غیرملکی سفارتکار پاکستان کے سفیر بن گئے ہیں-ستائیسویں جونیئر ڈپلومیٹک کورس میں 14 ممالک کے 19 ڈپلومیٹس نے فارن سروس اکیڈمی پاکستان سے تربیت مکمل کی اختتام پر  ستائیسویں ڈپلومیٹک کورس میں تربیت مکمل کرنے والے 19 فارن ڈپلومیٹس کو اسناد سے نوازا گیا۔