سردار تنویر الیاس نے کہا ہے کہ مسلح افواج کی شاندار پریڈ نے قوم میں نئی روح پھونک دی۔

صدر پی ٹی آئی آزاد کشمیر سردار تنویر الیاس نے پارٹی رہنماؤں سے گفتگو کرتے ہوئے کہا کہ پاکستان مل کر بنایا تھا، مل کر اس کی حفاظت کریں گے، مسلح افواج کی شاندار پریڈ نے قوم میں نئی روح پھونک دی ہے۔

انہوں نے کہا کہ پریڈ عزم اور حوصلے کا استعارہ ہے جو قوم کو اتحاد، تنظیم اور یقین محکم کا درس دیتی ہے، قوم اور فوج کے باہمی رشتے انمول ہیں، ان میں دراڑ ڈالنے کی کوشش ناکام بنا دی جائیگی۔

واضح رہے کہ اسلام آباد کے شکر پڑیاں پریڈ گراؤنڈ یوم پاکستان کی مرکزی تقریب کا انعقاد کیا گیا۔

پریڈ میں صدرِ مملکت ڈاکٹر عارف علوی ، وزیرِ اعظم عمران خان اور پاک فوج کے سربراہ جنرل قمر جاوید باجوہ سمیت مسلح افواج کے سربراہان ، وزیر دفاع پرویز خٹک، وفاقی وزیر منصوبہ بندی اسد اور دیگر نے شرکت کی۔

رواں برس قیام یومِ پاکستان کی مرکزی پریڈ کی تھیم ’شاد رہے پاکستان‘ رکھی گئی تھی جو قومی ترانے سے ماخوذ ہے۔

پریڈ میں مسلح افواج کے آرمڈ کور، ائیر ڈیفنس اور دیگر دستوں نے سامانِ حرب کے ساتھ حصہ لیا، اس موقع پر خصوصی فلائی پاسٹ کا بھی مظاہرہ کیا گیا۔

صدرِ مملکت ڈاکٹر عارف علوی کی آمد پر خصوصی بگل بجایا گیا، قومی ترانہ پڑھنے اور تلاوت کلام پاک کے بعد پریڈ کا باقاعدہ آغاز ہوا۔

صدرِ مملکت ڈاکٹر عارف علوی نے خصوصی جیپ میں سوار ہو کر مسلح افواج کا معائنہ کیا۔

او آئی سی کے وزرائے خارجہ کو بھی یومِ پاکستان پریڈ میں خصوصی طور پر مدعو کیا گیا تھا۔