وزیراعلیٰ پنجاب سردار عثمان بزدارسے ساؤتھ ایشیئن (سیف) گیمز2019 ء میں جیولین تھرو میں نیا ریکارڈقائم کرنے والے میاں چنوں کے رہائشی کھلاڑی ارشد ندیم کی ملاقات ہوئی۔

تفصیلات کے مطابق ارشد ندیم نے 86.29 میٹر دور نیزہ پھینک کر نیپال کے دارالحکومت کھٹمنڈو میں ہونے والی سیف گیمز میں گولڈ میڈل جیتا اور نیزہ پھینکنے کا نیا ریکارڈ بنا کر ٹوکیو اولمپکس کیلئے بھی کوالیفائی کیا ہے۔

وزیر اعلی نے ٹوکیو اولمپکس کیلئے کوالیفائی کرنے پر ارشد ندیم کو مبارکباد دی  جبکہ ارشد ندیم کو سیف گیمز میں نیاریکارڈ بنانے اور گولڈ میڈل جیتنے پر 5 لاکھ روپے کا چیک بھی  دیا۔

وزیراعلیٰ پنجاب کا کہنا تھا کہ ارشد ندیم نے سیف گیمزمیں گولڈ میڈل جیت کر پاکستان کا نام روشن کیا ہے اور  قوم کا سرفخر سے بلند کیاہے۔

سردار عثمان بزدار کا یہ بھی کہنا تھا کہ ارشد ندیم پروفیشنل اور با صلاحیت کھلاڑی ہیں جبکہ اس جیسے کھلاڑی پاکستان کا سرمایہ ہیں۔

وزیراعلیٰ پنجاب سردار عثمان بزدار کا مزید کہنا تھا کہ دعا گو ہوں کہ اللہ تعالیٰ ارشد ندیم کوآئندہ بھی کامیابیوں سے ہمکنار کرے اور پنجاب حکومت ارشد ندیم جیسے کھلاڑیوں کی حوصلہ افزائی کرتی رہے گی۔

وزیر اعلی نے شاندار کارکردگی اور پاکستان کا نام بلند کرنے پر ارشد ندیم کے والدین کو بھی مبارکباد دی جبکہ اس مو قع پر صوبائی وزیر کھیل تیمور بھٹی، ڈی جی پنجاب سپورٹس بورڈ کے علاوہ ارشد ندیم کے والدین، بھائی اور کمسن بیٹی بھی موجود تھی۔

 واضح رہے کہ اس سے قبل وزیراعلیٰ پنجاب سردار عثمان بزدار سے ارکان اسمبلی اور پی ٹی آئی ٹکٹ ہولڈرز نے وزیر اعلیٰ ہاؤس میں ملاقاتیں کیں تھی۔

وزیراعلیٰ پنجاب سردارعثمان بزدار نے کہا تھا کہ پنجاب لینڈ ریکارڈ اتھارٹی کے ذریعے پٹوار کلچر تبدیل کرنے کا وعدہ پورا کریں گے۔

وزیراعلیٰ پنجاب نے یہ بھی کہا تھا کہ پنجاب لینڈ ریکارڈ اتھارٹی اور بینکوں کا سروس لیول ایگریمنٹ اہم سنگ میل ہے جبکہ بینکوں اور مالیاتی اداروں کو ڈیجیٹل لینڈ ریکارڈ کے سنٹرل ڈیٹا بیس سے محفوظ لنک دیا گیا ہے۔

وزیراعلیٰ پنجاب سردارعثمان بزدار نے مزید کہا تھا کہ بینکوں میں تصدیق کے بعد کاشتکار یا دیگر کاروباری حضرات آسانی سے قرضے حاصل کر سکیں گے جبکہ بینک فردملکیت، انتقال اراضی،رجسٹری اور دیگر متعلقہ دستاویزات کی تصدیق کر کے لون پراسیس مکمل کرسکیں گے۔