شہباز گل نے دعویٰ کرتے ہوئے کہا ہے کہ ق لیگ نے وزیراعظم کی عدم اعتماد میں حمایت کا اعلان کر دیا۔

سماجی رابطے کی ویب سائٹ ٹویٹر پر وزیر اعظم کے معاون خصوصی برائے سیاسی ابلاغ ڈاکٹر شہباز گل نے دعویٰ کیا کہ ق لیگ نے وزیراعظم کی عدم اعتماد میں حمایت کا اعلان کر دیا، پاکستان تحریک انصاف چوہدری پرویز الہی کو وزیراعلی کے کینیڈیٹ کے طور پر سپورٹ کریں گے۔

پاکستان تحریک انصاف چوہدری پرویز الہی کو وزیراعلی کے کینیڈیٹ کے طور پر سپورٹ کریں گے۔ ق لیگ نے وزیراعظم کی عدم اعتماد میں حمایت کا اعلان کر دیا

— Dr. Shahbaz GiLL (@SHABAZGIL) March 28, 2022

علاوہ ازیں وفاقی وزیر اور مسلم لیگ (ق) کے رہنما مونس الٰہی کا کہنا ہے کہ وزیراعظم عمران خان سے پرویز الٰہی کی ملاقات کے دوران وزیراعلیٰ عثمان بزدار سے استعفیٰ لے لیا اور  حکومت نے چوہدری پرویز الٰہی کو وزیر اعلیٰ نامزد کردیا ہے جب کہ پرویز الٰہی نے بھی وزیراعلیٰ پنجاب بننے کی وزیراعظم کی آفر قبول کرلی ہے۔

دوسری جانب حکومت کی جانب سے اتحادیوں کو منانے کا مشن جاری ہے ، اس سلسلے میں وزیراعظم عمران خان سے اسپیکر پنجاب اسمبلی چوہدری پرویز الہیٰ نے بنی گالہ میں ملاقات کی۔ ملاقات میں مونس  الہٰی اور حسين الہٰی بھی شریک تھے۔

ادھر ملاقات سے متلعق گفتگو کرتے ہوئے چوہدری شجاعت نے کہا کہ پرویز الہٰی وزیر اعظم کی بات سننے گئے ہیں کوئی فیصلہ کرنے نہیں گئے۔

چوہدری شجاعت نے کہا کہ وزیر اعظم سے ملاقات کے بعد پرویز الہٰی دیگر اتحادیوں کو ملاقات سے آگاہ کریں گے اور جو بھی فیصلہ ہوگا اتحادیوں کی مشاورت سے ہوگا۔

واضح رہے کہ قومی اسمبلی میں وزیراعظم عمران خان  کے خلاف تحریک عدم اعتماد پیش کردی گئی۔

تفصیلات کے مطابق اپوزیشن کی ریکوزیشن پر ڈپٹی اسپیکر قاسم سوری کی زیر صدارت قومی اسمبلی کا اجلاس ہوا جس میں اپوزیشن لیڈر شہباز شریف نے وزیر اعظم کے خلاف تحریک  عدم  اعتماد پیش  کی۔

تحریک عدم اعتماد پیش ہونے پر ڈپٹی اسپیکر  نے کہا کہ  جو اس تحریک کے حق میں ہیں  وہ اپنی نشستوں پر کھڑے ہو جائیں جس پہ  اپوزیشن ارکان اپنی نشستوں پر کھڑے ہو گئے۔

اپوزیشن کے 161 اراکین نے تحریک کی حمایت   کی جس کے بعد تحریک عدم اعتماد کو بحث کے لیے منظور کرلیا گیا۔