سابق صدراورشریک چیئرمین پیپلزپارٹی  آصف زرداری کوآج کلفٹن میں واقع نجی اسپتال منتقل کیا جائے گاجس کیلئے تمام تیاریاں مکمل کرلی گئیں ۔

ذرائع کےمطابق آصف زرداری کوکلفٹن کےضیاالدین اسپتال میں منتقل کیاجائےگا جس سے پہلے ہی اسپتال کے چوتھے فلورپرعام افرادکےداخلےپر پابندی لگا دی گئی ۔

ذرائع نے بتایاکہ آصف زرداری کےچیک اپ کےلئےمیڈیکل بورڈ کے ڈاکٹرزبلاول ہاؤس پہنچے ہیں جو ان کا طبی معائنہ کریں گےاورمعائنے کےبعدانہیں اسپتال منتقل کردیاجائےگا۔

پیپلز پارٹی ذرائع کا کہناہے کہ  آصف زرداری کے اسپتال میں علاج کا تاحال فیصلہ نہ ہوسکا،ضمانت پر رہائی کے بعد آصف زرداری کی طبیعت کافی بہتر ہےاور وہ مستقل اسپتال منتقلی کے بجائےگھر پر رہ کر ہی علاج کرانے کےخواہاں ہیں۔

ذرائع کاکہناہے کہ معالجین کے مشورے پر آصف زرداری ٹیسٹ کے لیے اسپتال جاسکتے ہیں۔ ڈاکٹرز کی تجویز کے بعد اسپتال جانے یا بلاول ہاؤس رہنے کا فیصلہ کیا جائے گا۔

آصف زرداری کی اسپتال منتقلی کیلئےبلاول ہاؤس سےضیاالدین اسپتال کلفٹن تک سیکیورٹی کے سخت انتظامات کئے گئے ہیں۔

گزشتہ روزسابق صدر کوخصوصی طیارےکےذریعےکراچی منتقل کیاگیا ۔جس کے بعد وہ ہمشیرہ فریال تالپورسے ملنے ان کی رہائش گاہ گئے۔

 شریک چیئرمین پیپلزپارٹی اور فریال تالپورمیں پارٹی امورسمیت دیگراہم امورپرتبادلہ خیال کیا گیا۔ ملاقات میں بلاول بھٹوزرداری،بختاوراور آصفہ بھٹو بھی موجود تھے۔

سابق صدر کا اس موقع پر کہنا تھا کہ جمہوریت کی مضبوطی کیلئے سیاستدانوں کوقربانی دینی پڑتی ہے، اٹھارویں ترمیم کی وجہ سے صوبوں کوحقو ق مل رہےہیں، ملک میں جمہوریت کو نقصان پہنچانے نہیں دیں گے۔

واضح رہے کہ سابق صدر آصف علی زرداری کودو روز قبل پمزاسپتال سےڈسچارج کردیا گیا ہے۔

اس سے پہلےطبعیت ناسازی پراسلام آباد ہائی کورٹ نے جعلی اکاؤنٹس کیس میں سابق صدر کی درخواست منظور کرتے ہوئے ایک کروڑ کے دو مچلکےجمع کرانے کا حکم دیتے ہوئے ان کی ضمانت منظور کرلی۔

سابق صدر آصف زرداری کی جانب سےعدالت میں ایک ایک کروڑ روپے کے دو ضمانتی مچلکے جمع کروائے گئےجو احتساب عدالت نےمنظور کرتے ہوئے سابق صدر کی رہائی کےلئے روبکار جاری کیا۔

آصف زرداری کی رہائی کے احکامات موصول ہونے پر انہیں پمز اسپتال سےڈسچارج  کرکےکراچی منتقل کرنے کافیصلہ کیاگیا۔

یاد رہے کہ میڈیکل بورڈنے سابق صدر آصف علی زرداری کی طبی رپورٹ پیش کی تھی ، جس میں کہا گیا تھا کہ ملزم کا جیل میں علاج ممکن نہیں،آصف زرداری کو انجیو گرافی کی ضرورت ہے اور مزید اسٹنٹ ڈالنے کی صورت میں انجیو پلاسٹی بھی کرنا پڑےگی جیل میں رہنےسےجان کوخطرہ ہو سکتا ہے۔ جس کے بعد اسلام آباد ہائی کورٹ نے آصف زرداری کی طبی بنیادوں پر درخواست ضمانت منظورکی۔

سات ماہ سے نیب میں قید آصف زرداری پچھلے تین ہفتوں سےپمز اسپتال اسلام آباد میں زیرعلاج ہیں۔