افغانستان   کے صوبے غزنی میں طالبان کے  اندرونی حملے میں 23 فوجی ہلاک ہوگئے۔

غیر ملکی خبر رساں ادارے کے مطابق افغانستان کے جنوب مشرقی صوبے غزنی میں طالبان کے اندرونی حملے میں 23 فوجی ہلاک ہوگئے ہیں۔

صوبائی کونسل کے صدر ناصر احمد فقیری کا کہنا ہے کہ سات مقامی سیکیورٹی اہلکاروں نے قرباغ ضلع میں ایک فوجی اڈے پر اپنے ساتھیوں پر اس وقت فائرنگ کردی جب  وہ سو رہے تھے،جس سے وہ موقع پر ہی ہلاک ہوگئے۔

انہوں نے مزید کہا کہ ساتوں اہلکار فائرنگ کرکے اسلحے سمیت فرار ہوگئے۔ اہلکاروں کا تعلق واضح طور پر طالبا ن سے ہے۔

دوسری جانب افغان وزارت دفاع کے ترجمان فواد امن کا کہنا ہے کہ طالبان کے حملے میں 9 فوجی ہلاک ہوئے جبکہ حملے کی ذمہ داری طالبان نے قبول کرتے ہوئے کہا کہ غزنی فوجی بیس پر حملے میں 32 فوجی ہلاک ہوئے۔

واضح رہے کہ جنوب مشرقی صوبے غزنی میں گذشتہ روز سڑک کنارے نصب بم کے دھماکے میں 4 بچوں سمیت دس افراد جاں بحق ہوگئے تھے۔

یاد رہے کہ غزنی کے ضلع قارا باغ میں فوجی بیس میں یہ دوسرا حملہ ہے، اس سے قبل رواں برس جولائی میں بھی  ضلع قارا باغ کے فوجی بیس کو نشانہ بنایا گیا تھا جس کے نتیجے میں افغان آرمی فورسز کے کمانڈر کرنل عبد المبین محبتی ہلاک ہوئے تھے۔