ناسا کے خلاء باز مارک وینڈے ہئی دو روسی خلاء بازوں کے ہمراہ چار گھنٹے کا سفر کر کے بین الاقوامی خلائی اسٹیشن سے زمین پر واپس آگئے۔

یوکرین پر حملے کی وجہ سے امریکا اور روس کے درمیان جاری تناؤ کے باوجود ناسا نے دعویٰ کیا ہے کہ تینوں نے بین الاقوامی اسپیس اسٹیشن مین بغیر کسی چپقلش کے پیشہ ورانہ انداز میں کام کیا ہے۔

امریکا کے وینڈے ہئی اور روس کے پیوٹر ڈُوبروف نے زمین کے گرد گھومتی مشاہدہ گاہ میں گزشتہ برس 5 اپریل کو جانے کے بعد کُل 359 دن گزارے۔

روسکوسموس کے سربراہ ڈِمیٹری روگوزِن نے ٹیلی گرام میسنجر میں لکھا کہ ریسکیو کرنے والوں کے مطابق لینڈنگ کے بعد عملہ اچھا محسوس کر رہا ہے۔

وینڈے ہئی اور ڈُوبروف نے اپنے 359 روز کے مشن میں زمین کے گرد 5680 چکر لگائے جو 15 کروڑ میل سے زیادہ کا فاصلہ بنتا ہے۔

اس طویل مشن کے دوران واینڈے ہئی نے امریکی خلاء باز کا ہی طویل انفرادی خلائی پرواز کا ریکارڈ بھی توڑا۔ گزشتہ ریکارڈ 340 دن تک قیام کا تھا۔

تیسرے روسی خلاء باز شکیپلیروف گزشتہ برس 5 اکتوبر کو سویُوز MS-19 پر سوار ہو کر بین الاقوامی خلائی اسٹیشن گئے تھے۔

یہ ڈُوبروف کی پہلی پرواز تھی جبکہ شکیپلیروف کا یہ چوتھا مشن تھا اور کُل ملا کر انہوں نے خلاء میں 708 دن گزارے۔