خیبرپختونخوا میں بلدیاتی انتخابات کے دوسرے مرحلے میں پولنگ کے بعد ووٹوں کی گنتی جاری ہے۔

خیبر پختونخوا کے جن 18 اضلاع میں بلدیاتی انتخابات کے لئے پولنگ کا عمل مکمل ہوا ان میں اورکزئی، کرم، شمالی و جنوبی وزیرستان، ایبٹ آباد، مانسہرہ، بٹگرام، تورغر، اپر و لوئر کوہستان، سوات، شانگلہ، ملاکنڈ، اپر و لوئر دیر، اور چترال کے دونوں اضلاع شامل ہیں۔

خیپبر پختونخوا الیکشن کمیشن کی جانب سے جاری کیے گئے اعداد وشمار کے مطابق 18 اضلاع میں 65 تحصیلوں اور 1830 ویلیج و نیبرہُڈ کونسلز میں پولنگ ہوئی۔

بلدیاتی انتخابات کے دوسرے مرحلے میں مجموعی طور پر 6 ہزار 176 پولنگ اسٹیشن قائم کیے گئے، جس میں مردوں کے لیے ایک ہزار 246 ، خواتین کے ایک ہزار 164 اور 3 ہزار 766 مشترکہ پولنگ اسٹیشنز ہیں۔

بلدیاتی الیکشن میں 29 ہزار 3 سو 38 جب کہ تحصیل میئر اور چیئرمین کی نشستوں کے لئے 651 امیدوار ہیں۔

بلدیاتی انتخابات کے حوالے سے شکایات کے اندراج اور نمٹانے کے لئے الیکشن کمیشن سیکریٹریٹ میں مرکزی کنٹرول روم قائم کر دیا گیا ہے جبکہ مرکزی کنٹرول روم مسلسل نتائج کے آنے تک قائم رہے گا۔

ووٹنگ کے دوران امن و امان کی صورت حال بہتر رکھنے اور کسی بھی شر انگیزی کو پھیلنے سے روکنے کے لیے پولیس اور سیکیورٹی فورسز تعینات کی گئی تھیں۔ اس کے علاوہ انتہائی حساس پولنگ اسٹیشنوں پر سی سی ٹی وی کیمرے بھی نصب کیے گئے تھے۔

پولنگ کے دوران مختلف مقامات پر نقص امن کے اکا دکا واقعات رونما ہوئے تاہم کسی قسم کے جانی یا مالی نقصان کی اطلاع نہیں ملی۔