بلاول بھٹونے سکھر میں ورکرز کنونشن سے خطاب کرتے ہوئے کہا کہ پورے خاندان کو جیل بھیج دیں، آئین کے تحفظ کے عزم سے پیچھے نہیں ہٹیں گے۔

تفصیلات کے مطابق چیئرمین پاکستان پیپلز پارٹی بلاول بھٹو زرداری دو روزہ دورے پر سکھر پہنچ گئے، جہاں انھوں نےورکرز کنونشن سے خطاب کیا۔

بلاول بھٹو زرداری نے اپنی تقریر کا آغاز شہید بینظیر بھٹو کو بذریعہ نظم خراج عقیدت پیش کرنے سے کیا ۔

چیئرمین بلاول بھٹو زرداری نے خطاب میں کہا کہ جو کہتا تھا کہ وہ بھیک نہیں مانگے گا، اس نے آئی ایم ایف سے ڈیل کرکے معاشی خودکشی کرلی، عوام دشمن بجٹ میں امیروں کے لئے ریلیف اور غریبوں کے لئے بوجھ ہے۔

انھوں نے کہا کہ عوام کے لیے ہماری پارٹی نے بے شمار قربانیاں دی ہیں اور ہم آئین کے تحفظ کے عزم سے پیچھے نہیں ہٹیں گے۔

بلاول کا کہنا تھا کہ عوام کے لئےآصف زرداری ہنستےہوئےجیل چلے گئےاورفریال تالپور نے قربانی دی، پی پی قیادت کو آگے بھی جتنی قربانی دینی پڑیں، ہم اسکے لئے پوری طرح تیار ہیں۔

پیپلز پارٹی کے چیئرمین نے مزید کہا کہ جمہوریت اور آئین پرآج ہرطرف سے حملے ہو رہے ہیں، آئینی، معاشی اور جمہوری حقوق پرڈاکا مارا جا رہا ہے، ہم نے آئینی، معاشی اورجمہوری حقوق جانیں دے کر چھینے ہیں۔

بلاول بھٹو زرداری کا یہ بھی  کہنا تھا کہ آئین اور انسانی حقوق کے تحفظ پرآج پھرمل کر جدوجہد کرنی ہوگی، یہ سمجھتے ہیں کہ یہ ہمیں جیل بھیج کرڈرا لیں گے،یہ پورے خاندان کوجیل بھیج دیں، ہم آئین کے تحفظ سے پیچھے نہیں ہٹیں گے۔