ارسلان تاج نے کہا ہے کہ پی پی رہنما قومی مجرم ہیں، ان کا احتساب عوام جلد کرے گی۔

پی ٹی آئی سندھ کے ترجمان و رکن سندھ اسمبلی ارسلان تاج نے سعید غنی کے بیان پر رد عمل دیتے ہوئے کہا کہ گزشتہ ڈیڑھ ماہ سے سندھ حکومت نام کی چیز نظر نہیں آئی، پوری سندھ کابینہ اسلام آباد میں بیٹھی ہوئی ہے۔

انہوں نے کہا کہ سندھ حکومت بغیر وزراء کے کام کررہی ہے، سندھ ہاؤس اسلام آباد میں عوام کے لوٹے ہوئے پیسے کا بے دریغ استعمال کیا جارہا ہے، یہ پیسہ لوٹوں کی خریداری کے لیے استعمال کیا جارہا ہے۔

ارسلان تاج نے کہا ہے کہ سعید غنی کے منہ سے حب الوطنی کی باتیں مذاق لگتی ہیں، زرداری کے این آر او میں امریکی وزیر خارجہ کا کیا کردار رہا سب کو معلوم ہے، پیپلز پارٹی سیاسی جماعت نہیں بلکہ مافیا ہے۔

پی ٹی آئی سندھ کے ترجمان و رکن سندھ اسمبلی نے کہا ہے کہ بیرونی قوتوں کے آلائے کار آج ایک پیج پر اکھٹا ہیں، جب اس کرپٹ ٹولے کا احتساب کیا جائے تو اسے انتقام کا نام دیتے ہیں۔

انہوں نے کہا کہ زرداری کو سڑکوں پر گھسیٹنے والے شہباز شریف کے ساتھ بیٹھنا پیپلز پارٹی کے باعث شرم ہے، شرم نام کی چیز پی پی قیادت کے لیے کوئی معنی نہیں رکھتی، پی پی رہنما قومی مجرم ہیں، ان کا احتساب عوام جلد کرے گی۔

واضح رہے کہ وزیراطلاعات سندھ سعید غنی نے پریس کانفرنس کرتے ہوئے کہا تھا کہ گزشتہ ایک سال سے عدم اعتماد کی تحریک پر بات ہورہی ہے، بلاول نے ایک سال پہلے کہا کہ عدم اعتماد کی تحریک لائیں گے۔

انہوں نے کہا تھا کہ عمران خان نے ٹرمپ کارڈ اور سرپرائز کی بات کی، قوم اس کے پیچھے لگ گئی، ہم  چاہتے ہیں کہ عوام کو پتہ لگے کہ وہ کتنا جھوٹا ہے، ڈرون حملوں پرکسی جماعت نے بات نہیں کی۔

سعید غنی نے کہا تھا کہ آصف زرداری نے اپنے دور میں کھل کر ڈرون حملوں کی مخالفت کی، پیپلزپارٹی دور میں نیٹو کی سپلائی لائن بند کردی گئی تھی۔