شاہ رخ خان کے بیٹے آریان خان کے کروز شِپ منشیات کیس کے اہم گواہ کی پُراسرار موت کے بعد فلمی ناقد کمال راشد خان المعروف کے آر کے نے اپنا ردعمل دیا ہے اور طاقت کے ناجائز استعمال کی طرف اشارہ دیا ہے۔

کمال راشد خان نے سماجی رابطے کی ویب سائٹ ٹوئٹر پر جاری بیان میں کہا کہ آریان خان کیس کا گواہ پربھاکر سیل  پراسرار حالات میں مر گیا۔

انہوں نے کہا کہ یہ بھارت میں طاقتور لوگوں کو چیلنج کرنے کا نتیجہ ہے، ایسا لندن اور دبئی میں تو نہیں ہوتا۔

Prabhakar sail witness in #Aryankhan case is dead in mysterious circumstances. It is the result of challenging powerful people in India. It doesn’t happen in London and Dubai.

Advertisement

— KRK (@kamaalrkhan) April 2, 2022

واضح رہے کہ بھارتی میڈیا رپورٹس کے مطابق ممبئی کروز شپ کیس کے ایک آزاد گواہ پربھاکر سیل گزشتہ روز دل کا دورہ پڑنے کی وجہ سے چل بسے ،اُن کی موت کی تصدیق ایڈووکیٹ تشار کھنڈارے نے کی جو ان کی نمائندگی کر رہے تھے۔

پربھاکر سیل منشیات کروز شپ کیس میں ایک اور گواہ کے پی گوساوی کا ذاتی سیکیورٹی گارڈ تھا جس میں بالی ووڈ سپر اسٹار شاہ رخ خان کے بیٹے آریان خان کو سب سے پہلے گرفتار کیا گیا تھا، تاہم گوساوی نے آریان کے ساتھ ایک تصویر پوسٹ کی تھی اور یہاں تک کہ اُنہیں آریان خان کا ہاتھ کھینچتے ہوئے این سی بی کے دفتر لے جاتے ہوئے بھی دیکھا گیا تھا۔

بعد ازاں مہاراشٹر کے کابینہ وزیر نواب ملک نے گوساوی جیسے پرائیویٹ فرد کو کیس میں گواہ بنائے جانے کا معاملہ اٹھایا اور پوچھا کہ گوساوی آریان کو این سی بی کے دفتر میں گھسیٹ کر کیا کر رہے تھے۔

دوسری جانب پربھاکر سیل نے دعویٰ کیا تھا کہ اس نے این سی بی کے زونل ڈائریکٹر سمیر اور گوساوی کی مبینہ ادائیگی کے بارے میں گفتگو سنی ہے اور یہ انکشاف بھی کیا تھا کہ کروز پارٹی میں این سی بی کے چھاپے سے قبل ہی کے پی گوساوی کے پاس 10 لوگوں کی ایک فہرست موجود تھی جنہیں نشانہ بنانا تھا۔

اُنہوں نے اپنے بیان حلفی میں بتایا تھا کہ اسے گواہ بنایا گیا تھا اور اسے بغیر بتائے ہی 10 سادے کاغذوں پر دستخط کروائے تھے اور جس وقت یہ کارروائی ہو رہی تھی، اس کے پاس آدھار کارڈ بھی نہیں تھا۔

پربھاکر سیل کی چیٹ سے یہ بھی انکشاف ہوا تھا کہ اس نے اپنا آدھار کارڈ این سی بی ملازم سمیر کو بھیجا تھا۔

یاد رہے کہ اکتوبر کے اوائل میں آریان خان کو ممبئی کے کروز پر منشیات کے معاملے میں گرفتار کیا گیا تھا اور کئی عدالتی سماعتوں اور 26 دن کی طویل حراست کے بعد، بمبئی ہائی کورٹ نے 28 اکتوبر کو آریان کو ضمانت دے دی تھی۔

آخرکار وہ 30 اکتوبر کو اپنے والد کی سالگرہ کے موقع پر جیل سے باہر آگئے تھے۔