ایک سروے کے مطابق امریکی براعظم اور ایشیا پیسیفک خطے میں رہنے والے افراد نے پہلی مرتبہ کرپٹو کرنسیوں کے ذریعے ڈیجیٹل اثاثے خریدے ہیں۔ خریداری کے اس سلسلے کو کرپٹو کاروبار کے لیے بلاک بسٹر قرار دیا گیا ہے۔

امریکا میں کرپٹو کرنسی ایکسچینج جیمینئی نے اپنی تازہ سروے رپورٹ میں بتایا کہ 2021ء میں امریکا کے علاوہ لاطینی امریکا اور ایشیا پیسیفک کے ممالک میں رہنے والے ہزاروں افراد نے پہلی مرتبہ کرپٹو کرنسیوں کا استعمال کرکے ڈجیٹل اثاثے خریدے۔

جیمینئی ایکسچینج نے یہ سروے نومبر 2021ء سے فروری 2022ء کے درمیان کیا ہے۔ کرپٹو کرنسی کے کاروبار سے منسلک ماہرین نے 2021ء کو ایک شاندار سال قرار دیا۔

کرپٹو کرنسی ایکسچینج جیمینئی نے سروے رپورٹ میں بیان کیا کہ اِن چار ماہ کے دوران امریکا، لاطینی امریکا اور ایشیا پیسیفک خطے کے بیس ممالک میں 30 ہزار افراد نے کرپٹو کرنسیوں کے ذریعے ڈیجیٹل اثاثے خریدے۔

جیمنیئی کی رپورٹ مرتب کرنے والے ماہرین کا خیال ہے کہ ڈیجیٹل اثاثوں کی خریداری کی بنیادی اور بڑی وجہ مختلف ممالک میں افراطِ زر کی بڑھتی شرح اور بعض ممالک کی کرنسیوں کی قدر میں کمی کا نتیجہ ہے۔

جیمینئی کے مطابق 2021ء میں 79 فیصد افراد نے کرپٹو کرنسی خریدی کیونکہ ان کا تعلق ان ممالک سے تھا جہاں کی کرنسیوں کی قدر ڈالر کے مقابلے میں پانچ سے زائد مرتبہ کم ہوئی تھی۔

مثلاً ڈالر کے مقابلے میں بھارتی روپے میں ساڑھے سترہ فیصد کمی ہوئی۔ اسی طرح انڈونیشی روپے کی قدر 2011ء سے لے کر 2020ء تک پچاس فیصد کم ہو چکی ہے۔

سروے رپورٹ کے مطابق گزشتہ برس براعظم یورپ میں 17 فیصد افراد نے ڈیجیٹل اثاثے خریدے۔ کرپٹو کرنسی کے ماہرین رواں برس یورپ میں کرپٹو کرنسیوں کی خریداری پر نگاہ رکھے ہوئے ہیں۔

قابلِ ذکر بات یہ ہے کہ اس وقت کرپٹو کرنسی مارکیٹ میں ایک بِٹ کوائن کی قیمت 68 ہزار ڈالر تک پہنچ گئی ہے اور یہ اب تک کی ریکارڈ بلند ترین سطح ہے جبکہ کرپٹو کرنسی مارکیٹ کی مجموعی مالیت بھی 3 ٹریلین ڈالر کے قریب پہنچ چکی ہے۔