لتا منگھیشکر کو خراج تحسین پیش نہ کرنے پر کنگنا رناوت آسکر اور گریمی پر برہم۔

بھارتی میڈیا رپورٹ کے مطابق بالی وڈ اداکارہ کنگنا رناوت نے بھارت سے مطالبہ کیا ہے کہ وہ گلوکارہ لتا منگیشکرکو خراج تحسین پیش نہ کرنے پر بین الاقوامی سطح پر منعقد ہونے والے گریمی اور آسکر ایوارڈز کا بائیکاٹ کرے۔

یاد رہے کہ حال ہی میں دنیائے موسیقی کے اعلیٰ ترین گریمی ایوارڈ 64 ویں سالانہ تقریب میں’ان میموریم’ سیگمنٹ میں بھارتی گلوکارہ لتا منگیشکر کو خراج تحسین پیش نہیں کیا گیا جس پر بھارتیوں کی جانب سے شدید مذمت کی گئی۔

جبکہ اس سے ایک ہفتہ قبل، آسکرز نے بھی گلوکارہ کے نام کا ذکر بھی نہیں کیا، جس پر بھارتی اداکارہ کنگنا رناوت بھڑک اُٹھیں اور انہوں نے بھارت سے آسکرز اور گریمی کا بائیکاٹ کرنے کا مطالبہ کر دیا ہے۔

کنگنا نے اپنے انسٹاگرام پر پوسٹ کرتے ہوئے آسکر اور گریمی ایوارڈز پر تعصب اور نسل پرست ہونے کا الزام لگایا کیونکہ وہ مشہور بھارتی گلوکارہ لتا منگیشکر کو بار بار جان بوجھ کر خراج تحسین پیش کرنے میں ناکام رہے۔

کنگنا نے انہوں نے خاص طور پر میڈیا پر زور دیا کہ وہ ان ایوارڈز کی تقریبات کا مکمل بائیکاٹ کریں اور ان کو کوریج نہ دیں۔

واضح رہے کہ جب گریمی کی آفیشل ویب سائٹ پر تفصیلی فہرست جاری کی گئی تھی تو اس میں لتا منگیشکر کا نام درج تھا لیکن انہیں خراج تحسین پیش نہ کیا گیا جبکہ اس سے قبل آسکرز میں بھی یہی ہوا تھا۔