پاکستان تحریک انصاف کے رہنما شہباز گل نے کہا ہے کہ شہباز شریف نیازی قبیلے سے معافی مانگیں۔

اسلام آباد میں سپریم کورٹ کے باہر میڈیا کے نمائندوں سے گفتگو کرتے ہوئے شہباز گل نے کہا کہ فرح خان آپ کے ایم پی اے کی بہو ہے جس نے کل قرارداد جمع کرائی، کوئی کرپشن میں ملوث ہے تو عدالت کے پاس جائے۔

انہوں نے کہا کہ شہبازشریف میریٹ کے وزیراعظم، حمزہ شہباز فلیٹیز کا وزیراعلیٰ بنا ہوا ہے، شہبازشریف نے نیازی قبیلے کو نازی ازم سے ملایا، یہ نیازی قبیلے سے معافی مانگیں۔

تحریک انصاف کے رہنما کا کہنا ہے کہ رات کو مولانا فضل الرحمان نے ایک بیان دیا تھا، جس وقت وہ بیان دیا تو ان کا مقصد کیا تھا،انہوں نے کہا کہ اگر عدالت کا فیصلہ خلاف آیا تو ہم نہیں مانیں گے۔

شہباز گل نے کہا کہ مولانا فضل الرحمان کا شوق ان کے وکیل کو پورا کرنا چاہیے، عدالت آپ سے پوچھے کہ آپ کا وکیل یہاں کیوں ہے۔

انہوں نے کہا کہ آج یہاں سیاسی جماعت کے لیڈر نے بڑی غلط حرکت کی ہے، آج ایک سیاسی رہنما نے نیازی کو جرمن نازی کے ساتھ مشاہبت دی ہے۔

انکا کہنا ہے کہ پاکستان میں پوری تاریخ میں نیب نے اتنا پیسہ ریکور نہیں کیا جتنی ہماری حکومت میں ہوا، یہ تاثر دیا جاتا ہے کہ چور چور کا نعرہ لگایا جاتا ہے ریکور کیا کیا ہے۔

ڈاکٹر شہباز گل نے کہا کہ یہ ذہن میں رکھیں زمین داروں کے والی وارثوں کو بیرونی سازش سے ہٹایا گیا، ابسلوٹلی فراڈ کہنے والا ابسلوٹلی نیچ آدمی ہے۔

انہوں نے مزید کہا کہ قوم کو عمران خان کا بھی معلوم ہے اور ان کا بھی معلوم ہے، کل بھی یہاں واقعہ ہوا جو نہیں ہونا چاہیے تھا۔