سپریم کورٹ اور اسلام آباد ہائیکورٹ کے بعد اب الیکشن کمیشن کو بھی فوری طور پر کھولنے کے احکامات جاری کردئیے گئے ہیں۔

احکامات جاری ہوتے ہی چیف الیکشن کمشنر، سیکریٹری الیکشن کمیشن  اور دیگر افسران الیکشن کمیشن پہنچ گئے ہیں۔

الیکشن کمیشن سے پہلے اسلام آباد ہائیکورٹ کو رات 10 بجے کھولنے کا حکم دیا گیا تھا۔

چیف جسٹس اسلام آباد ہائیکورٹ اطہر من اللہ نے کورٹ روم نمبر ون کھونے کی ہدایت کردی ہے اور عدالتی عملے کو بھی فوری اسلام آباد ہائیکورٹ طلب کر لیا گیا ہے۔

یہ بھی پڑھیں: تحریک عدم اعتماد پر ووٹنگ میں تاخیر؛ سپریم کورٹ کے دروازے رات 12 بجے کھولنے کا حکم

رجسٹرار اسلام آباد ہائیکورٹ اپنے آفس پہنچ گئے ہیں جبکہ عدالت اور اطراف میں رینجرز تعینات کر دی گئی ہے۔

تھوڑی دیر میں اسلام آباد ہائیکورٹ میں اہم پٹیشن پر سماعت ہو گی۔

چیف جسٹس اسلام آباد ہائیکورٹ جسٹس اطہر من اللہ بھی اپنے آفس پہنچ گئے ہیں۔

گزشتہ دنوں اسلام آباد ہائیکورٹ نے ایک کیس کے تحریری حکم نامے میں امید کا اظہار کیا تھا کہ وزیراعظم حلف کی خلاف ورزی اور ملکی مفاد کے خلاف معلومات افشا نہیں کریں گے۔

ہائیکورٹ نے تحریری حکم نامے میں وزیراعظم کے حلف کا حوالہ دیا تھا اور کہا تھا کہ امید ہے کہ وزیراعظم اپنے حلف کی خلاف ورزی نہیں کریں گے۔

خیال رہے کہ وفاقی کابینہ نے مبینہ دھمکی آمیز خط قومی اسمبلی سے شیئر کرنے کی منظوری دے دی ہے۔

ذرائع کا کہنا ہے کہ دھمکی آمیز خط اسپیکر، چیف جسٹس اور چیئرمین سینیٹ کو بھی دکھایا جائے گا۔

چیف جسٹس کو حقائق سے آگاہ کیا جائے گا، خط کو ڈی کلاسیفائیڈ کیے جانے کا عمل جاری ہے۔