وزیراعظم شہباز شریف کی جانب سے کیے جانے والے عوامی ریلیف کے اعلانات پر عملدرآمد کا آغاز کردیا گیا ہے۔

اس حوالے سے مسلم لیگ ن کی ترجمان مریم اورنگزیب نے کہا ہے کہ وزیراعظم شہباز شریف وزیراعظم آفس پہنچے جس کے بعد انہوں نے باضابط ذمہ داریوں کی انجام دہی شروع کرتے ہوئے دفاتر کے اوقات کار میں تبدیلی کردی ہے۔

وزیراعظم کے احکامات کے مطابق سرکاری دفاتر کے اوقات کار میں تبدیلی کر دی، دفتر 10 بجے کے بجائے صبح 8 بجے کام شروع کریں گے جبکہ ہفتے میں 2 کے بجائے ایک دن کی تعطیل ہوگی۔

وزیراعظم شہباز شریف نے گزشتہ روز قومی اسمبلی میں کئے گئے اپنے اعلانات پر عملدرآمد کے احکامات جاری کر دئیے ہیں۔

رمضان المبارک کے دوران سستے بازاروں میں معیاری اور کم دام پر اشیاء کی فراہمی کو یقینی بنانے کا حکم جاری کرتے ہوئے سخت مانیٹرنگ یقینی بنانے کی ہدایت کی ہے۔

 اس حوالے سے شہباز شریف نے کہا ہے کہ عوام کو سستی اشیاء کی فراہمی میں غفلت برداشت نہیں کروں گا۔

اسکے علاوہ پینشنرز کی پینشن میں اضافے، کم از اکم اجرت 25 ہزار کرنے کے اعلانات پر فی الفور عمل درآمد کا حکم بھی جاری کردیا گیا ہے۔

اس موقع وزیراعظم نے افسران کو کہا کہ ایمان داری، شفافیت، مستعدی، انتھک محنت ہمارے راہنما اصول ہیں اس لئے کمر ہمت کس لیں، عوام کی خدمت کے لئے آئے ہیں، ایک لمحہ مزید ضائع نہیں کرنا ہے۔