معروف بالی وُڈ اداکارہ سونم کپور کے گھر کروڑوں کی چوری کس نے کی پولیس کو سُراغ مل گیا۔

بھارتی میڈیا رپورٹ کے مطابق بھارتی پولیس کا کہنا ہے کہ بالی ووڈ اداکارہ سونم کپور کے گھر کی نرس نے 2.4 کروڑ کی نقدی اور زیورات چوری کیے۔

اداکارہ سونم کپور کی دہلی رہائش گاہ پر کام کرنے والی ایک نرس کو فروری میں 2.4 کروڑ روپے کی نقدی اور زیورات چوری کرنے کے الزام میں اس کے شوہر کے ساتھ گرفتار کیا گیا تھا۔

پولیس نے بتایا کہ چوری 11 فروری کو ہوئی تھی اور 23 فروری کو تغلق روڈ پولیس اسٹیشن میں اس کی اطلاع ملنے پر پولیس کیس درج کیا گیا تھا۔

انہوں نے بتایا کہ کیس میں شکایت کنندہ سونم کپور اور ان کے شوہر آنند آہوجا کے گھر کی منیجر تھی جس میں 20 سے زیادہ لوگ کام کرتے ہیں۔

ایک سینئر پولیس افسر نے کہا کہ دہلی پولیس کی کرائم برانچ نے نئی دہلی ضلع کی اسپیشل اسٹاف برانچ کی ایک ٹیم کے ساتھ منگل کی رات چھاپہ مارا اور نرس کو اُس کے شوہر کے ساتھ گرفتار کیا۔

ذرائع کا کہنا ہے کہ چوری شدہ زیورات اور نقدی برآمد ہونا ابھی باقی ہے جبکہ مزید تفتیش جاری ہے۔

بھارتی میڈیا کا کہنا ہے کہ تغلق روڈ پولیس اسٹیشن نے کیس کو تحقیقات کے لیے نئی دہلی ضلع کی اسپیشل اسٹاف برانچ کو منتقل کردیا تھا، انہوں نے کہا کہ کرائم برانچ بھی اس معاملے کی تحقیقات کر رہی ہے۔