اپوزیشن لیڈر سندھ اسمبلی حلیم عادل شیخ نے کہا ہے کہ آج ایک تاریخی جلسہ ہوگا اور پوری دنیا دیکھے گی۔

حلیم عادل شیخ نے جلسہ گاہ میں میڈیا سے گفتگو کرتے ہوئے کہا کہ ایسا انقلابی احتجاج کسی نے نہیں دیکھا ہوگا، جنہوں نے قربانیاں دی یہ ان کا شہر ہے۔

انہوں نے کہا کہ ڈالرز اور پاؤڈر کی خاطر ایک ٹولے نے قوم کو بیچا، یہ ایک غداروں ملک دشمنوں کا ٹولہ ہے اور عمران خان ان لوگوں کے خلاف ڈٹ گئے ہیں۔

حلیم عادل شیخ نے مزید کہا کہ پوری دنیا میں قوم یکجہتی کے لیے باہر نکلی ہے، ہمارے قوم کے لیڈر کی کال پر دنیا بھر میں لوگ نکلے ہیں۔

واضح رہے کہ آج پاکستان تحریک انصاف (پی ٹی آئی) کا کراچی میں جسلہ ہونے جارہا ہے، سابق وزیر اعظم عمران خان آج جلسہ عام سے خطاب کریں گے، یہ جلسہ عمران خان کا حکومت کے خاتمے کے بعد دوسرا جلسہ ہے۔

کراچی میں تحریک انصاف کی جلسے کی تیاریاں مکمل ہوگئی ہیں۔

 قائدین کے جلسے کے لیے  ایک سو ساٹھ فٹ لمبا اور چوبس فٹ چوڑا اسٹیج تیار کیا گیا ہے جبکہ میڈیا کے لیے الگ انٹری اور کنٹینر کا کام بھی مکمل ہوچکا ہے۔

جلسے میں خواتین، فیملیز کے لیے الگ انکلوژر بنایا گیا ہے اور پنڈال میں بیٹھنے کے لیے ہزاروں کرسیاں لگادی گئی ہیں۔

اسکے علاوہ لائیٹنگ، ساؤنڈ اور بڑی اسکرینز سمیت تمام تکنیکی کام مکمل ہوچکا ہے، جلسے میں شرکت کے لیے عوام کے لیے شٹل سروس کا بھی بندوبست کیا گیا ہے۔

جلسے کی اندرونی سیکیورٹی پر تحریک انصاف کے رضاکار فرائض سرانجام دیں گے جبکہ جلسے کے شرکاء پارٹی اور قومی پرچم ساتھ لائیں گے۔

چیئرمین پی ٹی آئی عمران خان کے ہمراہ دیگر مرکزی قائدین بھی جلسے سے خطاب کریں گے۔