اسعد محمود نے کہا ہے کہ سیاسی جماعتیں بدمعاشیاں نہ کریں۔

جمعیت علماء اسلام (ف) کے پارلیمانی لیڈر مولانا اسعد محمود نے قومی اسمبلی میں اظہار خیال کرتے ہوئے کہا ہے کہ چاہتے ہیں سیاسی قوتیں آئینی کردار کے تحت کردارادا کریں، سیاسی جماعتیں بدمعاشیاں نہ کریں۔

انہوں نے کہا کہ گزشتہ حکومت نے وزیراعظم ہاؤس کی بھینسیں بیچیں،ریکارڈ پیش کیا جائے، توشہ خانے کا ریکارڈ بھی پارلیمنٹ میں پیش کیا جائے، ہم نے مل کے آئین کے تحفظ کیلئے جدوجہد کی۔

اسعد محمود نے کہا ہے کہ قومی اسمبلی میں آئین کے تحفظ کی جنگ جیتی ہے، پنجاب اسمبلی کے ممبران کے ساتھ ہیں، پنجاب اسمبلی میں بھی آئین کے تحفظ کی جنگ جیتیں گے۔

جمعیت علماء اسلام (ف) کے پارلیمانی لیڈر نے کہا کہ پی ٹی آئی کے استعفے پہلےبھی منظورنہیں کیے گئےتھے، ایک شخص تمام پارٹی ارکان کے استعفوں کا اعلان نہیں کرسکتا۔

انہوں نے کہا کہ آئین کےمطابق اسپیکرپی ٹی آئی ارکان سے استعفوں کی تصدیق کریں۔

اس سے قبل چیئر مین پیپلز پارٹی بلاول بھٹو نے قومی اسمبلی میں اظہار خیال کرتے ہوئے کہا ہے کہ پیپلز پارٹی کی جانب سے اسپیکر قومی اسمبلی کو مبارکباد پیش کرتا ہوں۔

انہوں نے کہا کہ جس کرسی پر آپ بیٹھے ہیں اس کی توہین ہوئی، پچھلے چند دنوں میں ہاؤس کے ساتھ مذاق کیا گیا، ہماری جمہوریت اور آٗئین کے ساتھ کھیلا گیا، آئین کے دفاع کے بغیر ہم پاکستانی نہیں کہلاسکتے۔

بلاول بھٹو نے کہا ہے کہ سلیکٹڈ وزیراعظم کو گرانا متحدہ حکومت کی کامیابی ہے، عوام کو امید کی کرن نظر آرہی ہے۔