مسجد الحرام میں نصب ساؤنڈ سسٹم دنیا کے سب سے بڑے صوتی نظاموں میں سے ایک ہے۔ اس سسٹم سے ساڑھے سات ہزار اسپیکرز منسلک ہیں جو مسجد الحرام میں اذان اور نماز کی روح پرور آواز کو کانوں کے ذریعے قلب میں اُتارتے ہیں۔

مسجد الحرام کے افعال اور دیکھ بھال کے اُمور میں الیکٹرانک بزنس ڈپارٹمنٹ کے ڈائریکٹر انجینیئر سعید العمری کے مطابق دنیا کا سب سے بڑا یہ آڈیو سسٹم انتہائی احتیاط اور مہارت کے ساتھ ترتیب دیا گیا ہے۔

جگہ کی ضرورت کے پیشِ نظر جدید صوتی آلات نصب کیے گئے ہیں اور اعلیٰ تربیت یافتہ ماہرین اس نظام کی روزانہ کی بنیاد پر دیکھ بھال کرتے ہیں تاکہ اس سسٹم کے ذریعے آواز بیت اللہ میں آنے والے تمام زائرین تک پہنچ سکے۔

انجینیئر سعید العمری کا کہنا ہے کہ مسجد الحرام میں آڈیو سسٹم کی کوریج محفوظ اور انتہائی مؤثر ہے جس میں خرابی کا امکان بہت کم ہے۔ بنیادی نظام میں کسی خرابی کی صورت میں غیر محسوس طریقے سے بیک اپ سسٹم پر منتقل ہوجاتا ہے اور مرمت کے بعد اسے دوبارہ پہلے سسٹم پر منتقل کر دیا جاتا ہے۔

الیکٹرانک بزنس ڈپارٹمنٹ کے ڈائریکٹر نے بتایا کہ تمام آڈیو مقامات کے لیے بجلی کی فراہمی کو یقینی بنانے کے لیے پورا آڈیو سسٹم اعلیٰ صلاحیت والے یُو پی ایس سے منسلک ہے۔ مسجد حرام کے ساؤنڈ سسٹم کو ایک مرکزی آپریشنل کنٹرول روم سے کنٹرول کیا جاتا ہے۔

انجینیئر سعید العمری کے مطابق مسجد الحرام کا الیکٹرانک ساؤنڈ سسٹم اعلیٰ درستگی کی خصوصیت کا حامل ہے۔ اس سسٹم کے انجینیئر، ٹیکنیشن، سپروائزر اور آپریٹر کے 65 سے زیادہ خصوصی آپریشنل ماہر موجود ہیں جو صاف اور واضح آواز کو حرمِ مکی کے تمام مقامات اور سامعین تک پہنچانے میں مصروفِ عمل رہتے ہیں۔