چاہے کوئی برگر ہو یا نوڈلز کا پیالہ، دنیا بھر میں کئی مشہور اور مزیدار پکوان نمک سے بھرپور ہوتے ہیں۔لیکن ماہرین ہمیں ہمارے کھانوں میں نمک زیادہ کھانے سے منع کرتے ہیں۔

اب سائنس دان ایک ایسا طریقہ سامنے لائے ہیں جس کے سبب ہم کھانے میں نمک کی مقدار کم کرتے ہوئے بھی اس کی لذت بھرپور طریقے سے محسوس کر سکیں گے۔

میجی یونیورسٹی کے محققین نے ایسی برقی چوپ اسٹکس بنائی ہیں جو ایک کلائی کے بینڈ کے ذریعے آپ کے منہ میں سوڈیم آئنز منتقل کرتے ہیں تاکہ نمکین ذائقے کا احساس پیدا کیا جاسکے۔

یہ چوپ اسٹکس برقی اسٹیمیولیشن اور کلائی میں پہنے گئے مِنی کمپیوٹر کی مدد سے ذائقہ پیدا کرتی ہیں۔

چوپ اسٹکس کے شریک تخلیق کار پروفیسر میاشیتا کا کہنا تھا کہ یہ ڈیوائس منہ میں سوڈیم آئنز کی منتقلی کے لیے ایک کمزور برقی کرنٹ استعمال کرتی ہے، جہاں وہ نمک کا ذائقہ پیدا کرتی ہیں۔

انہوں نے مزید کہا کہ اس کے نتیجے میں نمکین ذائقہ ڈیڑھ گُنا تک بڑھ جاتا ہے۔

ذائقہ بڑھانے والی یہ چوپ اسٹکس کی جاپان میں خصوصی اہمیت ہوسکتی ہے، جہاں روایتی غذاؤں میں نمک کا بھرپور ذائقہ ہوتا ہے۔ 

جاپان میں بالغ العمر افراد فی دن اوسطاً 10 گرام نمک تک کھاتے ہیں۔ یہ مقدار عالمی ادارہ صحت کی جانب سے تجویز کردہ مقدار سے دُگنی ہے۔