پاکستان نے دلی میں مسلمانوں کی جائیدادوں کے انہدام پر شدید تحفظات کا اظہار کیا ہے۔

ترجمان دفتر خارجہ عاصم افتخار احمد نے اپنے جاری کردہ بیان میں کہا کہ پاکستان دلی، بھارت میں مسلمانوں کی جائیدادوں کے انہدام پر شدید ترین تحفظات کا اظہار کرتا ہے۔

عاصم افتخار نے کہا کہ مسلمانوں کی جائیدادوں کو جہانگیرپوری، دلی میں منہدم کیا گیا، یہ تشویش ناک واقعہ مکمل طور پر بے حسی کا مظہر ہے۔

انکا کہنا ہے کہ یہ تشویش ناک واقعہ قانون کے عدم احترام، بھارت میں مسلمانوں کے خلاف گہری نفرت کا مظہر ہے، بھارت میں مسلمانوں کی جائیدادوں کی تباہی کا بیہودہ عمل انتہائی افسوسناک ہے۔

ترجمان دفترخارجہ نے مزید کہا کہ مسلم جائیدادوں کے رہائشیوں کو ان چھت کے بنیادی حق سے محروم کرنا اور انہیں ہندوتوا سے متاثرہ ریاستی مشینری کے رحم و کرم پر چھوڑنا افسوسناک ہے۔

واضح رہے کہ بھارتی دارالحکومت دہلی کی میونسپل کارپوریشن نے گزشتہ صبح نوٹس کے بغیر جہانگیر پوری کی جامع مسجد کے دروازوں سمیت بہت سی دکانوں کو مسمار کر دیا حالآنکہ سپریم کورٹ نے اس کارروائی کو روکنے کے احکامات جاری کیے تھے۔

چند روز پیشتر اس علاقے میں مسلم مخالف فسادات میں متعدد افراد زخمی ہوئے تھے۔ اس واقعے کے بعد حکمران جماعت بی جے پی کے رہنما نے ایم سی ڈی سے مطالبہ کیا تھا کہ وہ فسادات میں ملوث افراد کی املاک کو تباہ کر دے۔ دوسرے روز ہی حکام بلڈوزر کے ساتھ جہانگیر پوری پہنچ گئے۔

اِس سے قبل ریاست مدھیہ پردیش میں رام نومی کے جلوس کے دوران تصادم کے واقعات کے بعد ضلع کھرگون کی انتظامیہ نے مسلمانوں کے کم از کم 45 مکانات اور دکانیں مسمار کر دی تھیں۔