پاکستان تحریک انصاف کی جانب سے ملک بھر میں الیکشن کمیشن کے دفاتر کے باہر احتجاج کے اعلان کے بعد ای سی پی نے سیکیورٹی کے لئے وزارت داخلہ کو خط لکھ دیا۔

ملک بھر میں الیکشن کمیشن دفاتر کے باہر  پی ٹی آئی کی جانب سے احتجاج کے اعلان پر الیکشن کمیشن میں صوبائی الیکشن کمشنرز اور ضلعی دفاتر کی سیکیورٹی کے حوالے سے اجلاس منعقد ہوا ۔

اس دوران الیکشن کمیشن نے وزارت داخلہ کو سیکیورٹی کے حوالے سے خط بھی لکھا ہے جس کی پیش نظر الیکشن کمیشن کے دفاتر کی سیکیورٹی یقینی بنانے کے لیے سیکرٹری داخلہ کو ہدایات جاری کردی گئیں ہیں۔

اسکے علاوہ صوبائی اور ضلعی دفاتر کی سیکیورٹی یقینی بنانے کے لیے الیکشن کمیشن کا صوبائی حکومتوں کو بھی خط لکھا گیا ہے۔

خیال رہے کہ  پی ٹی آئی کے چیئرمین عمران خان نے کل دوپہر 12 بجے الیکشن کمیشن پنجاب کے دفتر کے سامنے احتجاج  کرنے کی کال دی ہے۔

انہوں نے بتایا ہے کہ الیکشن کمیشن سے منحرف ارکان کے خلاف ریفرنس کے فیصلے میں تاخیر پر احتجاج کیا جائے گا جو کہ پرامن طور پر کیا جائیگا۔

خیال رہے کہ احتجاجی مظاہر ے کی قیادت سابق وزراء ڈاکٹر یاسمین راشد، میاں محمودالرشید، میاں اسلم اقبال ڈاکٹر مراد راس کریں گے۔

یاد رہے کہ پاکستان تحریک انصاف کی جانب سے پنجاب اسمبلی میں موجود منخرف ارکان کے حوالے سے ریفرنسز جمع کرائے ہوئے ہیں۔

ریفرنسز میں مؤقف پیش کیا گیا ہے کہ پارٹی کی جانب سے احکامات جاری کیے جانے کے باوجود اراکین نے خلاف ورزی کرتے ہوئے حمزہ شہباز کے حق میں ووٹ دیا۔