روہت شرما نے آئی پی ایل 2022 میں ممبئی انڈینز کی خراب کارکردگی کا ذمہ دار بلے بازوں کو قرار دے دیا ہے۔

انڈین پریمئر لیگ (آئی پی ایل) کا 15 واں سیزن جاری ہے جس میں ممبئی انڈینز کو مسلسل 8 میچز میں شکستوں کا سامنا کرنا پڑا ہے۔

اتوار کو ممبئی انڈینز کا مقابلہ لکھنئو سپر جائنٹس سے ہوا جس میں انہیں 36 رنز سے شکست کا سامنا کرنا پڑا جبکہ اس میچ میں لکھنئو سپر جائنٹس کے کپتان کے ایل راہول نے 62 گیندوں پر 103 رنز کی ناٹ آؤٹ اننگ کھیلی تھی۔

لکھنئو نے ممبئی انڈینز کو جیت کے لیے 169 رنز کا ہدف دیا جس کے جواب میں ممبئی کا کوئی بھی کھلاڑی ڈبل فیگرز میں بھی داخل نہ ہوسکا۔

ممبئی انڈینز کی جانب سے واحد ان کے کپتان روہت شرما نے 39 رنز کی اننگ کھیلی جبکہ کیرون پولارڈ نے بھی صرف 19 رنز ہی اسکور کیے۔

لکھنئو سپر جائنٹس کے ہاتھوں شکست کے بعد ممبئی انڈینز پر پلے آف مرحلے سے باہر ہونے کا خدشہ منڈلا رہا ہے جبکہ ان شکستوں کا ذمہ دار روہت شرما نے بلے بازوں کو قرار دیا ہے۔

روہت شرما کا بھارتی اسپورٹس چینل سے گفتگو کرتے ہوئے کہنا تھا کہ جب آپ کے پاس اس طرح کا ہدف ہو تو آپ کو ایک مضبوط شراکت کی ضرورت ہوتی ہے جو بدقسمتی سے ہم نہ کرسکے۔

انہوں نے کہا کہ ہم نے کچھ غیر ذمہ دارانہ شارٹس بھی کھیلے جس میں میں خود بھی شامل تھا اور جب ہمیں میچ جیتنے کے لیے جس رفتار کی ضرورت تھی وہ ہم حاصل نہ کرسکے۔

ان کا کہنا تھا کہ ہم نے اس ٹورنامنٹ میں اچھی بلےبازی کا مظاہرہ نہیں کیا اور یہ سارا معاملہ بیٹنگ آرڈر پر جاتا ہے، جو بھی درمیان میں کھیلتا ہے اسے یہ ذمہ داری قبول کرنا چاہیے۔

روہت شرما نے کہا کہ ہمیں اس بات کو یقینی بنانا ہوگا کہ کوئی بھی بلے باز ایک لمبی بیٹنگ کرے لیکن ہم ایسا کرنے میں ناکام رہے۔

واضح رہے کہ ممبئی اڈٰیز 5 مرتبہ آئی پی ایل کا ٹائٹل اپنے نام کرچکی ہے جبکہ اس سال پلے آف مرحلے میں بھی جانے کا امکان نظر نہیں آرہا ہے۔