وفاقی وزیر پاور انجینئیر خرم دستگیر نے کہا ہے کہ سیاست میں نفرت کی دیوار کو پاکستان تک محدود رکھاجائے تو بہتر ہوگا۔

وزیر پاور انجینئیر خرم دستگیر نے پریس کانفرنس کے دوران کہا ہے کہ ریاست مدینہ کے دعوے کرنے والوں نے کل شب مدینہ کا تقدس پامال کیا ہے۔

انہوں نے کہا کہ گزشتہ شب پیش آنے والے واقعے پر سعودی اتھارٹیز نے ایکشن لیا اب ایسا نہیں ہوگا اور ہماری استدعاہےنفرت کی سیاست ختم کی جائے۔

پریس کانفرنس کے دوران بجلی کی موجودہ صورتحال پر بات کرتے ہوئے خرم دستگیر کا کہنا تھا کہ بجلی کےبحران کی وجہ سےلوڈشیڈنگ ہورہی ہے اور بجلی بحران کی ذمہ دارسابق حکومت ہے۔

 انہوں نے کہا کہ توانائی بحران کی ایک اور وجہ نظام میں تکنیکی خرابیاں ہیں اور اگر ماضی کی حکومت بروقت ایندھن کا انتظام کرتی تومسائل نہ ہوتے۔

ان کا کہنا تھا کہ یکم مئی سے ایل این جی اور 2 مئی سے فرنس آئل اور گیس ملے گی جس کے بعد اگلے 10 دن میں لوڈ شیڈنگ میں کمی ہوگی۔

انہوں نے کہا کہ کچھ پلانٹس مرمت کے لیے بند ہیں  جس کی وجہ سے 2 ہزارسے زائد میگاواٹ بجلی نہیں بن رہی ہے۔

انہوں نے بتایا ہے کہ بجلی پیداکرنے والے بجلی گھروں میں ملازمین کی عید کی چھٹیاں کینسل کردیں گئیں ہیں ۔

خرم دستگیر نے بتایا کہ ایندھن کی عدم دستیابی کے باعث ساڑھے 5 ہزار میگاواٹ بجلی نہیں بنا پا رہے، ٹیکنیکل فالٹ، مین ٹینس کے باعث2  ہزارسے زائد میگاواٹ بجلی سسٹم میں نہیں ہے۔

انہوں نے کہا ہے کہ فرنس آئل اور ایل این جی سمیت مطلوبہ ایندھن مئی میں آجائیں گے  اور ایندھن دستیاب ہونے سے لوڈشیڈنگ پر قابو پایا جاسکے گا ۔

ان کا کہنا تھا کہ سابق حکمرانوں کی غلط پالیسیوں سے آج یہ دن دیکھنا پڑ رہا ہے  لیکن آئندہ 15 روز میں فرق سب کو نظر آنا شروع ہوجائے گا۔

اس موقع پر انہوں نے بتایا کہ دس سے بارہ گھنٹوں کی لوڈشیڈنگ کا دورانیہ چند روز میں نصف ہوجائے  گا اور بجلی فراہمی کا مکمل ڈیٹا بھی جاری کیا جائے گا۔