پاکستان کی جانب سے افغانستان کے سیلاب متاثرین کے لیے ریلیف سامان کی دوسری کھیپ روانہ کردی گئی ہے۔

وزیر اعظم پاکستان جناب میاں محمد شہباز شریف کی ہدایت پر این ڈی ایم اے نے آج پاکستان ائیرفورس کےC-130 طیارے کے ذریعے افغانستان کے سیلاب متاثرین کے لیے ریلیف سامان کی دوسری کھیپ مزار شریف کے لیے روانہ کر دی ہے۔

ریلیف سامان کی یہ کھیپ فیملی ٹینٹ، آٹا، چاول اور چینی پر مشتمل ہے۔

واضح رہے کہ اس سلسلے کی پہلی کھیپ 7مئی کو روانہ کی گئی تھی۔

امدادی اشیاء کی دوسری کھیپ 9 مئی 2022 کو افغانستان روانہ ہوگی.

وزیرِ اعظم شہباز شریف نے اس عزم کا اعادہ کیا کہ افغانستان میں سیلاب زدگان کی امداد کیلئے پاکستان ہر ممکن کوشش کرے گا.

— Prime Minister’s Office (@PakPMO) May 7, 2022

خیال رہے کہ اس سے قبل وزیراعظم شہباز شریف نے افغانستان میں سیلاب کے باعث جانی و مالی نقصان پر افسوس کا اظہار کیا۔

اپنے ایک بیان میں شہباز شریف نے متعلقہ حکام کو افغانستان کے سیلاب سے متاثرہ عوام کو امداد کی فراہمی کا بھی حکم دیا تھا اور کہا کہ پاکستان متاثرین کے لئے ہنگامی امداد بھجوا رہا ہے۔

وزیراعظم شہباز شریف نےافغانستان کے سیلاب زدگان سے اظہار ہمدردی کرتے ہوئے عالمی برادری اور اوآئی سی افغان ہیومینٹیرین ٹرسٹ کے فورم سے متاثرہ افغان عوام کی مدد کی کوششوں کو تیز کرنے کا بھی مطالبہ کیا۔