خیبرپختونخوا فوڈ سیفٹی اتھارٹی کی جانب سے مختلف شہروں میں کی گئی کارروائیوں میں مضر صحت مشروبات برآمد کرلیے گئے ہیں۔

تفصیلات کے مطابق فوڈ سیفٹی اتھارٹی نے ضلع خیبر میں جعلی مشروبات کے گودام پر چھاپا مار کر بڑی مقدار میں مضر صحت مشروبات برآمد کر لئے۔

فوڈ سیفٹی اتھارٹی نے بتایا کہ کارروائی میں 4000 لیٹر سے زائد جعلی مشروبات برآمد کر کے گودام کو سیل کردیا گیا ہے۔

فوڈ سیفٹی اتھارٹی کا کہنا ہے کہ چارسدہ میں غیر معیاری جوس تیار کرنے پر ایک یونٹ سیل کردیا گیا ہے جبکہ دو بیکریوں کو یونٹس ناقص صفائی اور مضر صحت رنگ استعمال کرنے پر سیل کیا گیا ہے۔

علاوہ ازیں بنوں میں مختلف برف کے کارخانوں کا معائنہ کیا گیا مور لیبارٹری سے پانی کا جائزہ لیا گیا، ناقص صفائی اور غیر معیاری پانی کے استعمال پر دو برف کے کارخانے سیل کردیئے گئے ہیں۔

واضح رہے کہ فوڈ سیفٹی اتھارٹی نے کارروائی کے دوران دیگر کئی یونٹس کو بہتری کے لئے نوٹسز جاری کردیئے ہیں۔

خیال رہے کہ کچھ روز قبل ہی خیبرپختونخوا فوڈ سیفٹی اتھارٹی کی جانب سے جعلی گڑ تیار کرنے والے یونٹ کے خلاف کی گئی کارروائی کے نتیجے  میں 1400 کلو چینی، خراب گڑ اور مضر رنگ  ضبط کرلیا گیا تھا۔

ڈی جی فوڈ سیفٹی اتھارٹی شاہ رخ علی خان کا کہنا ہے کہ یونٹ میں گنے کے بجائے چینی، خراب گڑ اور مضر صحت رنگوں کی مدد سے گڑ تیار کیا جارہا تھا۔

ڈی جی فوڈ سیفٹی اتھارٹی کے مطابق مارکیٹ میں صاف اور محفوظ خوراک کی فراہمی یقینی بنا رہے ہیں، عوام بھی ملاوٹ مافیا کے خلاف شکایات ہمارے ٹال فری نمبر پر درج کرائیں۔