ناصر حسین شاہ نے کہا ہے کہ شیخ خلیفہ بن زید النہیان کے انتقال سے پاکستان ایک مخلص دوست سے محروم ہوگیا ہے۔

اپنے ایک بیان میں یو اے ای کے صدر شیخ خلیفہ بن زید النہیان کے انتقال پر وزیر بلدیات سندھ سید ناصر حسین شاہ نے گہرے رنج و غم کا اظہار کیا ہے۔

سید ناصر حسین شاہ کا کہنا تھا کہ شیخ خلیفہ بن زید النہیان کے انتقال سے مسلم امہ ایک مخلص لیڈر سے محروم ہوگئی۔

انہوں نے کہا کہ شیخ خلیفہ بن زید النہیان کے انتقال سے پاکستان ایک مخلص دوست سے محروم ہوگیا، مسلم امہ کی بہبود کے لئے شیخ خلیفہ بن زید النہیان کی خدمات  ہمیشہ یاد رکھی جائیں گی۔

ناصر حسین شاہ نے کہا کہ متحدہ عرب امارات کے شاہی خاندان اور اماراتی عوام کے دکھ میں سندھ حکومت اور عوام ان کے ساتھ ہیں اور تعزیت پیش کرتے ہیں۔

وزیر بلدیات سندھ سید ناصر حسین شاہ نے مزید کہا کہ شیخ خلیفہ بن زید النہیان کے دور میں پاکستان اور متحدہ عرب امارات کے تعلقات کو مزید استحکام ملا۔

واضح رہے کہ غیر ملکی خبر رساں ادارے کی رپورٹ کے مطابق یو اے ای کے صدر اور ابو ظہبیٰ کے حکمران شیخ خلیفہ بن زائد النہیان انتقال کرگئے ہیں۔

اس حوالے سے متحدہ عرب امارات کی وزارت برائے صدارتی امور کی جانب سے ابو ظہبیٰ کے حکمران شیخ خلیفہ بن زائد النہیان کے انتقال پر 40 دن کے سوگ کا اعلان کیا گیا ہے جبکہ وزارت کی جانب سے جاری اعلان میں 3 دن کی عام تعطیل کا اعلان بھی کیا گیا ہے۔

وزارت کی جانب سے جاری بیان میں کہا گیا کہ اس دوران متحدہ عرب امارات کے قومی پرچم بھی سرنگوں رہیں گے جب کہ یو اے ای کی تمام وزارتوں اور اداروں میں کام آج سے ہی روک دیا گیا ہے جبکہ وفاقی اور مقامی اداروں میں بھی کسی قسم کا کام نہیں کیا جائے گا۔