عدالت نے کلفٹن میں پلاٹوں کی غیرقانونی الاٹمنٹ سے متعلق سماعت بغیرکارروائی کے ملتوی کر دی۔ 

تفصیلات کے مطابق کراچی کی احتساب عدالت میں کلفٹن میں پلاٹوں کی غیر قانونی الاٹمنٹ سے متعلق ریفرنس کی سماعت ہوئی۔

پی ایس پی کے سربراہ مصطفی کمال اور دیگر ملزمان عدالت کے سامنے پیش ہوئے۔

سماعت کے دوران متعلقہ جج کی ریٹائرمنٹ کے بعد لنک جج کی عدالت میں پیش کرتے ہوئے احتساب عدالت نے ریفرنس کی سماعت بغیر کارروائی کے 30 جون تک ملتوی کردی۔

احتساب عدالت نمبر تین میں اہم ریفرنسز زیر سماعت ہیں، لیکن گزشتہ کئی ماہ سے جج کی تعیناتی نہ ہونے کے باعث ریفرنسز کی سماعت بغیر کارروائی کے ملتوی کی جارہی ہیں۔

احتساب عدالت نمبر تین میں اسپیکر سندھ اسمبلی آغا سراج درانی کا بھی ریفرنس زیر سماعت ہے۔

احتساب عدالت کے باہرمیڈیا سے گفتگو کرتے ہوئے سربراہ پی ایس پی مصطفٰی کمال نے کہا کہ کراچی کو چالیس برسوں سے کوئی بھی نہیں چلا رہا۔ 13 سالوں میں گاؤں دیہاتوں سے برا حال ہوچکا ہے۔ یہاں لوگ نوکری تلاش کرنے آتے تھے، اب زبوں حالی کا شکار ہے۔

انھوں نے کہا کہ پی ٹی آئی نے چودہ سیٹیں حاصل کیں، سابق وزیراعظم دورہ کرتے رہے۔  پیپلزپارٹی کو کھلی چھوٹ دے رکھی تھی۔ ان کو پتا تھا ن لیگ اور پیپلزپارٹی ایک ہوگئے تو ان کی حکومت چلی جائے گی۔

مصطفٰی کمال نے یہ بھی کہا کہ ناظم جوکھیو کا قتل سامنے ہونے کے باوجود قاتل آزاد ہیں۔

مذید پڑھیں